កងកម្លាំងអ៊ីស្រាអែល បានប្រយុទ្ធជាមួយក្រុមយុទ្ធជនប៉ាឡេស្ទីននៅក្នុងទីក្រុងរ៉ាហ្វា (Rafah) ភាគខាងត្បូងហ្កាហ្សា កាលពីថ្ងៃអាទិត្យ (២១ កក្កដា) ដោយវាយលុកតំបន់កណ្តាល ដែលប្រជាជនភៀសខ្លួនប៉ាឡេស្ទីនរាប់ពាន់នាក់កំពុងស្វែងរកទីជម្រក។

អ្នកស្រុកក្នុងទីក្រុង Rafah ជិតព្រំដែនជាមួយប្រទេសអេហ្ស៊ីប បាននិយាយថាមានការប្រយុទ្ធគ្នាយ៉ាងខ្លាំងក្លារវាងអ្នកប្រយុទ្ធដឹកនាំដោយក្រុមហាម៉ាស និងកងកម្លាំងអ៊ីស្រាអែល ជាពិសេសនៅភាគកណ្តាល និងតំបន់ភាគខាងលិច ជាទីដែលរថក្រោះបានវាយរុលកាលពីពីរថ្ងៃមុន។

ស្លាបប្រដាប់អាវុធនៃក្រុមជីហាតអ៊ីស្លាម និងក្រុមសកម្មប្រយុទ្ធហាម៉ាស បាននិយាយថា ក្រុមអ្នកប្រយុទ្ធបានប្រឈមមុខនឹងកងកម្លាំងអ៊ីស្រាអែល ជាមួយនឹងគ្រាប់រ៉ូកែតប្រឆាំងរថក្រោះ និងគ្រាប់បែកត្បាល់។

យោធាអ៊ីស្រាអែលបាននិយាយថា ទាហានរបស់ខ្លួនបានសម្លាប់ក្រុមអ្នកប្រយុទ្ធ ហើយបានបំផ្លាញគ្រាប់រំសេវ ផ្លូវរូងក្រោមដី និងហេដ្ឋារចនាសម្ព័ន្ធនៅក្នុងតំបន់ តែលអាល់ស៊ូតាន (Tel al-Sultan) ភាគខាងកើតនៃទីក្រុងហ្កាហ្សា។

កិច្ចខិតខំប្រឹងប្រែងបទឈប់បាញ់ដែលដឹកនាំដោយកាតា និងអេហ្ស៊ីប និងគាំទ្រដោយសហរដ្ឋអាមេរិក រហូតមកដល់ពេលនេះបានបរាជ័យដោយសារតែការមិនចុះសម្រុងគ្នារវាងភាគីជម្លោះ ដែលបានស្តីបន្ទោសគ្នាទៅវិញទៅមកចំពោះភាពជាប់គាំងនេះ៕