ស្ថានទូតចិនប្រចាំប្រទេសហ្វីលីពីន បាននិយាយនៅថ្ងៃចន្ទ (២២ កក្កដា) នេះថា សហរដ្ឋអាមេរិកគួរតែផ្តល់ការពន្យល់ដល់ប្រជាជនហ្វីលីពីន ឱ្យបានឆាប់តាមដែលអាចធ្វើទៅបានសម្រាប់ការឃោសនាមិនពិតរបស់ខ្លួនប្រឆាំងនឹងវ៉ាក់សាំងកូវីដ១៩ (COVID-19) របស់ចិន។

ការលើកឡើងនេះផ្តោតលើរបាយការណ៍ស៊ើបអង្កេតរបស់សារព័ត៌មានរ៉យទ័រ ដែលបាននិយាយថា យោធាអាមេរិកបានចាប់ផ្តើមកម្មវិធីលាក់កំបាំងមួយក្នុងអំឡុងពេលជំងឺរាតត្បាតកូវីដ ដើម្បីបង្ខូចឈ្មោះវ៉ាក់សាំង ស៊ីណូវ៉ាក់ (Sinovac) របស់ចិន នៅក្នុងប្រទេសហ្វីលីពីន។

អ្នកនាំពាក្យស្ថានទូតចិនបាននិយាយថា សហរដ្ឋអាមេរិកគួរតែកែតម្រូវការប្រព្រឹត្តខុសឆ្គងរបស់ខ្លួនជាបន្ទាន់ ហើយឈប់ប្រើពាក្យកុហកដើម្បីបំភាន់ពិភពលោក បញ្ឈប់ការបង្កាច់បង្ខូច និងធ្វើឱ្យប្រទេសដទៃទៀតខូចឈ្មោះ។

ប្រតិបត្តិការលួចលាក់របស់យោធាអាមេរិកមួយនេះមិនត្រូវបានគេរាយការណ៍ពីមុនទេ។ ការស៊ើបអង្កេតរបស់រ៉យទ័របានរកឃើញថា កម្មវិធីនោះមានគោលបំណងសាបព្រួសការសង្ស័យអំពីសុវត្ថិភាព និងប្រសិទ្ធភាពនៃវ៉ាក់សាំង និងជំនួយសង្គ្រោះជីវិតផ្សេងទៀត ដែលត្រូវបានផ្គត់ផ្គង់ដោយចិន។ រ៉យទ័របានកំណត់ថា កិច្ចប្រឹងប្រែងប្រឆាំងវ៉ាក់សាំងរបស់យោធាអាមេរិកនេះ បានចាប់ផ្តើមនៅនិទាឃរដូវឆ្នាំ២០២០ ហើយបានពង្រីកខ្លួនលើសពីតំបន់អាស៊ីអាគ្នេយ៍ មុនពេលវាត្រូវបានបញ្ចប់នៅពាក់កណ្តាលឆ្នាំ២០២១៕