ប្រធានាធិបតីសហរដ្ឋអាមេរិក លោក Joe Biden បានបញ្ចប់យុទ្ធនាស្វែងរកការជាប់ឆ្នោតឡើងវិញរបស់លោក កាលពីថ្ងៃអាទិត្យ (ទី២១ ខែកក្កដា) បន្ទាប់ពីសមាជិករបស់គណបក្សប្រជាធិបតេយ្យ បានបាត់បង់ជំនឿលើភាពរឹងប៉ឹងផ្នែកផ្លូវចិត្ត និងសមត្ថភាពរបស់លោក ក្នុងការយកជ័យជម្នះលើលោក Donald Trump ។

លោកបានប្រកាសពីការសម្រេចចិត្តនេះ តាមរយៈលិខិតមួយដែលត្រូវបានបង្ហោះនៅលើបណ្ដាញសង្គម ហើយនៅក្នុងការបង្ហោះជាបន្តបន្ទាប់ លោកបានគាំទ្រអនុប្រធានាធិបតី គឺលោកស្រី Kamala Harris ជាបេក្ខជនរបស់គណបក្ស។

តាមរយៈការដកស្រង់ខ្លះៗពីលិខិតនោះ លោក Biden បានរៀបរាប់ថា៖ «វាជាកិត្តិយសដ៏ធំធេងបំផុតក្នុងជីវិតរបស់ខ្ញុំ ដែលបានធ្វើជាប្រធានាធិបតីរបស់អ្នក។ ហើយបើទោះបីជាវាជាគោលបំណងរបស់ខ្ញុំ ក្នុងការស្វែងរកការជាប់ឆ្នោតឡើងវិញក៏ដោយ ក៏ខ្ញុំជឿថា ផលប្រយោជន៍របស់គណបក្ស និងប្រទេសរបស់ខ្ញុំ គឺរឿងសំខាន់បំផុត ដែលខ្ញុំត្រូវដកខ្លួន និងផ្ដោតតែលើការបំពេញកាតព្វកិច្ច ក្នុងនាមជាប្រធានាធិបតី សម្រាប់អាណត្តិនៅសល់របស់ខ្ញុំ»។

គួរបញ្ជាក់ថា ការសម្រេចរបស់លោកនេះ អាចបើកផ្លូវឲ្យអនុប្រធានាធិបតី លោកស្រី Kamala Harris ឈរនៅក្នុងតំណែងបេក្ខជនទី១ របស់គណបក្ស ដោយនេះបានធ្វើឲ្យលោកស្រីក្លាយជាស្ត្រីស្បែកខ្មៅដំបូងគេបង្អស់ ដែលទទួលបានតំណែងនេះ ក្នុងប្រវត្តិសាស្ត្ររបស់ប្រទេស៕