ភ្នំពេញ ៖ កម្ពុជា-ទីម័រខាងកើត ពង្រឹងកិច្ចសហការលើប្រតិបត្តិការធនាគារកណ្តាល ការតភ្ជាប់ការទូទាត់សងប្រាក់ នវានុវត្តន៍ហិរញ្ញវត្ថុ ឌីជីថល ការត្រួតពិនិត្យធនាគារ បរិយាបន្នហិរញ្ញវត្ថុ ការអភិវឌ្ឍធនធានមនុស្ស នឹងការពង្រឹងកិច្ចសហប្រតិបត្តិការបច្ចេកទេសជាដើម។

​លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងឯកឧត្តម Hélder Lopes ទេសាភិបាលធនាគារកណ្តាល ទីម័រខាងកើត នៅថ្ងៃទី ២២ ខែ កក្កដា ឆ្នាំ ២០២៤ នេះ បានអញ្ជើញជាអធិបតីក្នុងកិច្ចប្រជុំទ្វេភាគី និងចុះហត្ថលេខាលើអនុស្សរណៈ យោគយល់ ដោយកិច្ចប្រជុំទ្វេភាគីនេះគឺជាកិច្ចប្រជុំលើកដំបូង រវាងធនាគារជាតិនៃកម្ពុជា និងធនាគារកណ្តាលទីម័រខាងកើត ដែលបាន បង្ហាញពីការចាប់ផ្តើមនៃកិច្ចសហប្រតិបត្តិការ និងចំណងមិត្តភាពយ៉ាងជិតស្និទ្ធ ក្នុងគោលដៅរួមចំណែកអភិវឌ្ឍវិស័យធនាគារ នៃ ប្រទេសទាំងពីរឱ្យកាន់តែរីកចម្រើនថែមទៀត។

ក្នុងស្មារតីនៃកិច្ចសហប្រតិបត្តិការល្អប្រសើរនេះ, ថ្នាក់ដឹកនាំនៃធនាគារកណ្តាលទាំងពីរ បានពិភាក្សា និងផ្លាស់ប្តូរយោបល់លើ ស្ថានភាពសេដ្ឋកិច្ច នយោបាយរូបិយវត្ថុ និងដំណើរការវិវត្តនៃវិស័យធនាគារនៃប្រទេសទាំងពីរ ជាពិសេសផ្តោតលើការចែករំលែកនូវ បទពិសោធន៍ និងយុទ្ធសាស្ត្រនៃការលើកកម្ពស់ការប្រើប្រាស់រូបិយវត្ថុជាតិដុល្លារូបនីយកម្ម ក៏ដូចជាប្រធានបទសំខាន់ៗផ្សេងទៀត ដែលមានអត្ថប្រយោជន៍សម្រាប់ធនាគារកណ្តាល និងប្រទេសទាំងពីរ។

ក្នុងឱកាសនេះដែរ ទេសាភិបាលនៃធនាគារកណ្តាលទាំងពីរ បានអញ្ជើញចុះហត្ថលេខាលើអនុស្សរណៈយោគយល់ មានគោល បំណងពង្រឹងកិច្ចសហការលើ៖ ប្រតិបត្តិការធនាគារកណ្តាល, ការតភ្ជាប់ការទូទាត់សងប្រាក់, នវានុវត្តន៍ហិរញ្ញវត្ថុឌីជីថល, ការត្រួត ពិនិត្យធនាគារ, បរិយាបន្នហិរញ្ញវត្ថុ និងការអភិវឌ្ឍធនធានមនុស្ស។ តាមរយៈអនុស្សរណៈយោគយល់នេះ មន្ត្រីជំនាញនៃធនាគារ កណ្តាលទាំងពីរ នឹងពង្រឹងកិច្ចសហប្រតិបត្តិការបច្ចេកទេសកាន់តែរឹងមាំ តាមរយៈកិច្ចពិភាក្សាផ្លាស់ប្តូរយោបល់ជាប្រចាំ ការចែករំលែក ព័ត៌មាន និងទិន្នន័យពាក់ព័ន្ធនឹងសេដ្ឋកិច្ច និងហិរញ្ញវត្ថុ ព្រមទាំងបទពិសោធន៍និងចំណេះដឹងលើការងារបច្ចេកទេសជាដើម។ ថ្នាក់ ដឹកនាំនៃធនាគារកណ្តាលទាំងពីរ បានវាយតម្លៃខ្ពស់ ចំពោះលទ្ធផលនៃកិច្ចប្រជុំខាងលើ និងបានសម្រេចឱ្យមានកិច្ចប្រជុំជាប្រចាំឆ្នាំ ព្រមទាំងបានប្តេជ្ញាបន្តពង្រឹង និងពង្រីកកិច្ចសហប្រតិបត្តិការនេះឱ្យកាន់តែរឹងមាំ និងទទួលបានលទ្ធផលផ្លែផ្កាជាទីមោទនៈ៕

អត្ថបទ៖ សុន រ៉ាឌី