សាលារៀនគ្រូយើង សាខាភ្នំពេញ និងគ្រឹះស្ថានមីក្រូហិរញ្ញវត្ថុ អម្រឹត នៅព្រឹកថ្ងៃទី២២ ខែ​កក្កដា ឆ្នាំ២០២៤នេះ បានចុះហត្ថលេខា លើកិច្ចព្រមព្រៀងកិច្ចសហប្រតិបត្តិការភាពជាដៃគូ ក្នុង​គោលបំណងកសាងទំនុកចិត្ត និងពង្រឹងភាពរឹងមាំសម្រាប់ស្ថាប័នទាំងពីរ និងដើម្បី​ជា​ប្រយោជន៍​សម្រាប់សាធារណៈ និងបុគ្គលិកនៃស្ថាប័នទាំងពីរ។

លោកគ្រូ យិន សុភាព ប្រធានក្រុមប្រឹក្សាភិបាល និងជាស្ថាបនិក នៃសាលារៀនគ្រូយើង នៅ​ក្រោយ​ចប់​ពិធីចុះហត្ថលេខានេះ បានមានប្រសាសន៍ប្រាប់បណ្តាញអ្នកសារព័ត៌មានឲ្យដឹងថា កិច្ច​ព្រមព្រៀងកិច្ចគ្នាក្នុងពេលនេះ គឺដើម្បីផ្ដល់ភាពងាយស្រួលដល់អតិថិជន និងបុគ្គលិក​របស់​គ្រឹះ​ស្ថាន​មីក្រូហិរញ្ញវត្ថុ អម្រឹត ដោយពួកគាត់នឹងទទួលបានការបញ្ចុះតម្លៃពី ២០ ទៅ ៣០%​ភ្លាមៗ​នៅ​ពេលដែលបញ្ចូនបុត្រាបុត្រីមកសិក្សារនៅសាលារៀនគ្រូយើង សាខាភ្នំពេញ។ លោក​បាន​បន្ថែម​ថា ការចាប់ដៃគូជាមួយ អម្រឹត នេះដែរ គឺជាឱកាស​មួយ​សម្រាប់​ការ​ពង្រីក​កេរ្តិ៍​ឈ្មោះ​សា​លាកាន់តែរីកសុះសាយបន្ថែមទៀត ខណៈសាលារៀន​គ្រូយើង​បាន​ដំណើរ​ការ​រ​ហូត​មក​ដល់​ពេល​នេះ មានរយៈពេលជាង ២០ឆ្នាំមកហើយ នៅក្នុងខេត្តរតនគិរី និងខេត្តស្ទឹងត្រែង។

លោក តាន់ យូហៃ នាយកអង្គភាពផ្នែកលក់ នៃគ្រឹះស្ថានមីក្រូហិរញ្ញវត្ថុអម្រឹត បានទទួលស្គាល់ថា កិច្ច​សហការគ្នានេះដែរ ពិតជាមានសារៈសំខាន់ណាស់ ពីព្រោះស្ថាប័ន​ទាំងពីរ​មាន​បំណង​ដូចគ្នា​ដើម្បី​បំពេញ​ឲ្យ​គ្នាទៅវិញទៅមក។ លោកបានបន្តថា ដោយសារសាលារៀនគ្រូ​យើង​មាន​ទស្សនៈ​ដ៏​វែង​ឆ្ងាយ ក្រៅពីការបណ្តុះបណ្តាលកូនខ្មែរឲ្យមានចំណេះដឹងប្រកបដោយគុណភាព ថែមទាំង​មាន​មហិ្ឆចតាជំរុញកូនខ្មែរអាចបន្តការសិក្សានៅក្រៅប្រទេសថែមទៀតផង ក្នុងគោលដៅ​លើក​មុខ​មាត់​ប្រទេសកម្ពុជាឲ្យស្មើមុខ ស្មើមាត់ជាមួយប្រទេសដទៃ និងដើម្បីរួមចំណែក​ក្នុង​ការ​អភិវឌ្ឍ​ប្រទេ​សជាតិឲ្យកាន់តែរីកច្រើន តាមរយៈវិស័យអប់រំនៅកម្ពុជាទើបអម្រឹតសម្រេច​ចិត្តក្នុង​ការ​បង្កើត​ភាពជាដៃគូក្នុងពេលនេះ។

សូមបញ្ជាក់ជូនថា ដើម្បីទទួលបាននូវលក្ខខណ្ឌការបញ្ចុះតម្លៃសិក្សា ពីសាលារៀនគ្រូយើង ចំពោះ​បុគ្គលិករបស់ អម្រឹត ត្រូវបង្ហាញកាតសម្គាល់ ឬគណនី ដែលមាននៅ​ក្នុង​កម្ម​វិធី​សេវា​ធនាគារ​ចល័តរបស់អម្រឹត ឬកាត ATM ឬបណ្ណព័ត៌មានគណនី ឬសៀវភៅសន្សំ​ដែល​ចេញ​ដោយ​អម្រឹត​នៅ​ពេលចុះឈ្មោះបង់ថ្លៃសិក្សា។ ដោយឡែក ចំពោះអតិថិជនរបស់អម្រឹត ត្រូវបង្ហាញ​គណនី​ដែល​មាននៅក្នុងកម្មវិធីសេវាធនាគារចល័ត ឬកាត ATM ឬបណ្ណព័ត៌មានគណនី ឬ​សៀវភៅ​សន្សំដែលចេញដោយអម្រឹត នៅពេលចុះឈ្មោះបង់ថ្លៃសិក្សា។ ការផ្តល់ជូនតម្លៃ​ពិសេស​នេះ គឺសម្រាប់តែការបង់ថ្លៃសិក្សាសរុបប្រចាំឆ្នាំតែប៉ុណ្ណោះនៅសាលារៀនគ្រូយើង សាខា​ភ្នំពេញ៕ អត្ថបទ ឈិត បូរ៉ាវី