ទូរទស្សន៍ al-Masirah គ្រប់គ្រងដោយក្រុមហ៊ួទី បានរាយការណ៍កាលពីថ្ងៃអាទិត្យ ដោយបានដកស្រង់សេចក្តីថ្លែងការណ៍របស់អាជ្ញាធរសុខាភិបាលថា ចំនួនអ្នកស្លាប់ដោយសារការវាយប្រហារតាមអាកាសរបស់អ៊ីស្រាអែលទៅលើទីក្រុងកំពង់ផែ Hodeidah ដែលកាន់កាប់ដោយក្រុមហ៊ួទីនៅប្រទេសយេម៉ែន បានកើនឡើងដល់ ៦នាក់ហើយ ដោយមនុស្ស ៨៣នាក់ផ្សេងទៀត បានរងរបួស និងបីនាក់ បានបាត់     ខ្លួន។ 

ការវាយប្រហារនេះ បានកើតឡើងកាលពីល្ងាចថ្ងៃសៅរ៍ ដោយបានបំផ្លាញឃ្លាំងស្តុកប្រេងឥន្ធនៈជាច្រើនកន្លែង និងរោងចក្រថាមពល។

ការវាយប្រហារនោះដែរ បានបណ្តាលឲ្យមានអគ្គិភ័យឆេះយ៉ាងសន្ធោសន្ធៅ ដែលបានបន្តជិត ២០ម៉ោងចាប់តាំងពីការវាយប្រហារ បានកើតឡើង។

ការវាយប្រហារតាមអាកាសរបស់អ៊ីស្រាអែល បានកើតឡើងមួយថ្ងៃបន្ទាប់ពីក្រុមហ៊ួទី បានអះអាងទទួលខុសត្រូវចំពោះការវាយប្រហារដោយយានដ្រូន នៅក្នុងទីក្រុងតែលអាវីវរបស់អ៊ីស្រាអែល ដែលបានសម្លាប់មនុស្សម្នាក់ និង ១០នាក់ផ្សេងទៀត រងរបួស។ នេះបើយោងតាមប្រព័ន្ធផ្សព្វផ្សាយអ៊ីស្រាអែល។

បន្ទាប់ពីការវាយប្រហាររបស់អ៊ីស្រាអែល ក្រុមហ៊ួទី បានប្ដេជ្ញាធ្វើការវាយប្រហារសងសឹក។

កាលពីខែវិច្ឆិកាកន្លងទៅ ក្រុមឧទ្ទាមហ៊ួទី បានចាប់ផ្តើមបាញ់មីស៊ីលបាលីស្ទីក និងការវាយប្រហារដោយយានដ្រូន សំដៅលើនាវាដែលមានទំនាក់ទំនងជាមួយអ៊ីស្រាអែលក្នុងសមុទ្រក្រហម និងឈូងសមុទ្រ Aden ដោយនិយាយថា ការវាយប្រហាររបស់ខ្លួន គឺនៅក្នុងសាមគ្គីភាពជាមួយប៉ាឡេស្ទីន នៅតំបន់ហ្កា ហ្សាស្ទ្រីប។