ឯកអគ្គរដ្ឋទូតអ៊ុយក្រែនប្រចាំប្រទេសទួរគី លោក Vasily Bondar បាននិយាយថា ទោះបីជាណាតូ មិនទាន់សម្រេចចិត្តអំពីសមាជិកភាពរបស់អ៊ុយក្រែនក៏ដោយ ក៏ទីក្រុងគីវ ជឿជាក់ថា ខ្លួននឹងត្រូវបានអនុញ្ញាតឲ្យចូលជាមួយសម្ព័ន្ធភាពយោធានេះ បន្ទាប់ពីជម្លោះ ត្រូវបានដោះស្រាយ។

លោក បាននិយាយនៅក្នុងបទសម្ភាសន៍ជាមួយប៉ុស្តិ៍ទូរទស្សន៍ Haberturk ថា៖«កិច្ចព្រមព្រៀងដែលបណ្តាប្រទេសណាតូ សម្រេចបាននៅក្នុងកិច្ចប្រជុំកំពូលចុងក្រោយក្នុងទីក្រុងវ៉ាស៊ីនតោន ដើម្បីបែងចែកប្រាក់ជាង ៤០ពាន់លានដុល្លារដល់អ៊ុយក្រែន គឺជាជំហានដ៏ល្អ និងជាចំហ ក្នុងការគាំទ្រដល់ប្រទេសនេះ។ ប៉ុន្តែ អង្គការណាតូ មិនទាន់បានឆ្លើយសំណួរចម្បងនោះទេ គឺអំពីសមាជិកភាពរបស់អ៊ុយក្រែន។ យើងជឿថា យើងនឹងក្លាយជាសមាជិកណាតូ ដើម្បីរក្សាសន្តិភាពនៅអឺរ៉ុប បន្ទាប់ពីសង្គ្រាម ត្រូវបានបញ្ចប់។ 

កិច្ចប្រជុំកំពូលរបស់អង្គការណាតូ ដែលបានធ្វើឡើងនៅទីក្រុងវ៉ាស៊ីនតោន កាលពីថ្ងៃទី ៩-១១ ខែកក្កដា បានផ្តោតលើការប្រឈមមុខជាមួយរុស្ស៊ី និងជំនួយយោធាដល់អ៊ុយក្រែន។ ក្រុមមេដឹកនាំអង្គការណាតូ បានយល់ព្រមបែងចែកជំនួយយោធាចំនួន ៤០ពាន់លានអឺរ៉ូ ដល់អ៊ុយក្រែន នៅឆ្នាំ ២០២៥។

លោក Bondar បាននិយាយថា បទឈប់បាញ់ គឺមិនគ្រប់គ្រាន់ជាមូលដ្ឋានសម្រាប់ដោះស្រាយជម្លោះអ៊ុយក្រែនទេ។ លោកបានសង្កត់ធ្ងន់ថា៖«បទឈប់បាញ់ គឺមិនគ្រប់គ្រាន់ទេ។ លក្ខខណ្ឌសំខាន់ គឺបូរណភាពទឹកដីរបស់ប្រទេសអ៊ុយក្រែន»។