រដ្ឋមន្ត្រីការបរទេសស៊ីរី លោក Faisal Mekdad កាលពីថ្ងៃអាទិត្យ បាននិយាយថា ទំនាក់ទំនងស៊ីរី-រុស្ស៊ី បានឆ្លងផុតទំនាក់ទំនងមិត្តភាពប្រពៃណី និងបានឈានឆ្ពោះទៅរកកម្រិតថ្មីមួយនៃកិច្ចសហប្រតិបត្តិការជាយុទ្ធសាស្ត្រ។

លោកបានធ្វើការអត្ថាធិប្បាយក្នុងពេលថ្លែងសុន្ទរកថាក្នុងព្រឹត្តិការណ៍វប្បធម៌មួយ នៅមជ្ឈមណ្ឌលវប្បធម៌ និងសិល្បៈ Al-Assad ក្នុងក្រុងដាម៉ាស( Damascus)ដោយប្រារព្ធខួបលើកទី ៨០ នៃទំនាក់ទំនងការទូតរវាងស៊ីរី និងរុស្ស៊ី។

លោក Mekdad បាននិយាយថា៖«ទំនាក់ទំនងស៊ីរី-រុស្ស៊ីដែលមានរយៈពេលយូរ បានមើលឃើញពីការអភិវឌ្ឍ និងការផ្លាស់ប្តូរសំខាន់ៗក្នុងប្រវត្តិសាស្ត្រ ដែលអនុញ្ញាតឲ្យទីក្រុងដាម៉ាស និងទីក្រុងមូស្គូ លើសពីមិត្តភាពធម្មតា និងជាមូលដ្ឋានគ្រឹះសម្រាប់កម្រិតថ្មីនៃកិច្ចសហប្រតិបត្តិការជាយុទ្ធសាស្ត្រ» ។

លោកបាននិយាយថា ប្រទេសស៊ីរី មានមោទនភាព និងកិត្តិយស ក្នុងការ«សម្រេចបាននូវជ័យជម្នះរួមគ្នាជាមួយរុស្ស៊ី ក្នុងវិស័យផ្សេងៗ» ហើយទន្ទឹងរង់ចាំឃើញជ័យជម្នះនៃគំរូមួយដោយផ្អែកលើការសន្ទនា ការគោរពចំពោះអ្នកដទៃ និងផលប្រយោជន៍របស់ប្រជាជននៃប្រទេសទាំងពីរ។

ឯកអគ្គរដ្ឋទូតរុស្ស៊ីប្រចាំនៅទីក្រុងដាម៉ាស លោក Alexander Yefimov បានលើកឡើងពីគំនិតទាំងនេះ ដោយបញ្ជាក់ពីភាពរឹងមាំនៃទំនាក់ទំនងស៊ីរី-រុស្ស៊ី។

លោក Yefimov បាននិយាយថា៖«ទំនាក់ទំនងស៊ីរី-រុស្ស៊ី បានជម្នះការលំបាកទាំងអស់ ហើយរុស្ស៊ីតែងតែត្រៀមខ្លួនជាស្រេច ក្នុងការផ្តល់ការគាំទ្រដល់ស៊ីរី គ្រប់ពេលវេលា»។