អ្នកគាំទ្ររបស់គណបក្សប្រជាធិបតេយ្យ បានស្វាគមន៍ការដកខ្លួនរបស់ប្រធានាធិបតី លោក Joe Biden ពីការប្រកួតប្រជែងតំណែងប្រធានាធិបតី ជាមួយនឹងសាច់ប្រាក់យ៉ាងច្រើនសន្ធឹកសន្ធាប់ ដោយបាននាំគ្នាបរិច្ចាគច្រើនជាង ៥០លានដុល្លារអាមេរិក តាមប្រព័ន្ធអ៊ីនធឺណិត កាលពីថ្ងៃអាទិត្យ (ទី២១ ខែកក្កដា) ដោយចំនួននេះធ្វើឲ្យក្លាយជាថ្ងៃទទួលបានប្រាក់បរិច្ចាគច្រើនបំផុត ក្នុងរយៈពេលតែ ១ថ្ងៃ សម្រាប់គណបក្សប្រជាធិបតេយ្យ តាមអ៊ីនធឺណិត គិតចាប់តាំងពីការបោះឆ្នោតឆ្នាំ២០២០ មក។

ចំនួនទឹកប្រាក់ដ៏ច្រើននេះ គឺផ្អែកលើការវិភាគរបស់សារព័ត៌មាន New York Times លើការចូលរួមវិភាគទានតាមប្រព័ន្ធអ៊ីនធឺណិតដែលរក្សាដោយ ActBlue ជាគេហទំព័រឈានមុខគេដែលគ្រប់គ្រងលើការបរិច្ចាគរបស់គណបក្សប្រជាធិបតេយ្យ។

ដោយលោក Biden បានដកខ្លួន ហើយអនុប្រធានាធិបតី លោកស្រី Kamala Harris ទទួលបានការនូវការតែងតាំងជាបេក្ខជនទី១ យ៉ាងលឿននោះ អ្នកគាំទ្រគណបក្សប្រជាធិបតេយ្យ បានចូលរួមវិភាគទានក្នុងល្បឿនដ៏គួរឲ្យភ្ញាក់ផ្អើល។ ការវិភាគបង្ហាញថា ការបរិច្ចាគបានកើនឡើងពីចំនួនជាមធ្យមតិចជាង ២០០.០០០ដុល្លារ ក្នុងមួយម៉ោង ពោលគឺក្នុងរយៈពេលប៉ុន្មានម៉ោង មុនពេលលោក Biden លាលែងពីតំណែង រហូតឡើងដល់ជិត ១១,៥លានដុល្លារ ក្នុងរយៈពេលតែមួយម៉ោងក្រោយមក នៅថ្ងៃទី២១ ខែកក្កដា នោះ។

គិតត្រឹមម៉ោង ១០យប់ ថ្ងៃទី២១ ខែកក្កដា គឺជាថ្ងៃដ៏ធំបំផុតទី៣ របស់គេហទំព័រ ActBlue សម្រាប់ការបរិច្ចាគតាមប្រព័ន្ធអ៊ីនធឺណិត ក្នុងប្រវត្តិសាស្ត្ររបស់ខ្លួន៕