រដ្ឋមន្ត្រីការបរទេសសហភាពអឺរ៉ុប (EU) នឹងពិភាក្សាថា តើត្រូវដោះស្រាយដោយរបៀបណា ចំពោះការធ្វើដំណើរទស្សនកិច្ចនាពេលថ្មីៗនេះរបស់នាយករដ្ឋមន្ត្រីហុងគ្រី លោក Viktor Orban ទៅកាន់ប្រទេសរុស្ស៊ី និងចិន ដែលលោកបានធ្វើឡើងដោយគ្មានអាណត្តិរបស់ EU។ នេះបើតាមការឲ្យដឹងពីប្រធានគោលនយោបាយអឺរ៉ុប លោក Josep Borrell នាថ្ងៃចន្ទ (ទី២២ ខែកក្កដា) នេះ។

សកម្មភាពនេះ ទន្ទឹមនឹងការមានមន្ទិលសង្ស័យលើហុងគ្រីអំពីតួនាទីរបស់ EU នៅអ៊ុយក្រែន និងទំនាក់ទំនងដ៏ជិតស្និទ្ធរបស់លោក Orban ជាមួយរុស្ស៊ីហើយនោះ ត្រូវបានលោក Borrell ចាត់ទុកថា ជារឿង «មិនអាចទទួលយកបាន»។

អមដោយការពណ៌នាពីការធ្វើដំណើរនោះថា «មិនអាចទទួលយកបាន» លោក Borrell បាននិយាយថា៖ «យើងនឹងពិភាក្សាអំពីអ្វីដែលបានកើតឡើង និងជំហរដែលរដ្ឋាភិបាលហុងគ្រី បានប្រកាន់ខ្ជាប់»។

ពាក់ព័ន្ធនឹងករណីនេះ សមាជិកសហភាពអឺរ៉ុបមួយចំនួន គាំទ្រឲ្យមានជំហរតឹងរ៉ឹង ក្នុងនោះរួមទាំងអាចធ្វើពហិការកិច្ចប្រជុំថ្នាក់រដ្ឋមន្ត្រី នៅទីក្រុង Budapest ផងដែរ។

តែទោះជាយ៉ាងណាក៏ដោយ ការយល់ឃើញ មិនមានភាពស្របគ្នាទាំងស្រុងនោះទេ ដោយរដ្ឋមន្ត្រីការបរទេសរបស់ប្រទេសលុចសំបួ បានសង្កត់ធ្ងន់លើសារៈសំខាន់នៃកិច្ចសន្ទនា។ ចំណែករដ្ឋមន្ត្រីការបរទេសហុងគ្រី បានការពារសកម្មភាពរបស់ពួកគេថា ជា «បេសកកម្មសន្តិភាព» ហើយបានរិះគន់ការឆ្លើយតបរបស់ EU។

គួរបញ្ជាក់ថា ប្រទេសហុងគ្រីបានឡើងកាន់តំណែងជាប្រធានប្តូរវេនរយៈពេល ៦ខែរបស់ប្លុកនេះ ក្នុងខែកក្កដា ហើយភ្លាមៗ លោកប្រធានថ្មីនេះបានធ្វើដំណើរទៅកាន់ទីក្រុងមូស្គូ និងប៉េកាំង ជាអ្វីដែលលោកបានពិពណ៌នាថា ជា «បេសកកម្មសន្តិភាព» ទោះបីជាគ្មានដៃគូសហភាពអឺរ៉ុបរបស់លោក បានដឹង ឬយល់ព្រមឲ្យលោកធ្វើបែបនោះក៏ដោយ៕