​​លោតទឹក៖ ​កីឡាការិនី​អូស្ត្រាលី Rhiannan Iffland បាន​បន្ត​ស្ថិតិ​អស្ចារ្យ​របស់ខ្លួន​បន្តទៀត​ក្នុងការ​ប្រកួត​លោតទឹក Red Bull Cliff Diving World Series បន្ទាប់ពី​យកឈ្នះ​ការប្រកួត​លើក​ទី ១០ ក្នុង​អាជីព​នៅ​ប្រទេស​បូ​ស្នៀ​ចុង​សប្តាហ៍​កន្លងទៅ​។

​​កីឡាការិនី​វ័យ ២៩ឆ្នាំ​អូស្ត្រាលី​រូបនេះមិនបាន​បង្ហាញ ​ពី​អារម្មណ៍​ព្រួយ​ភ័យ​បន្តិច​ណា​ឡើយ​នៅពេល​ឈរលើ​ស្ពាន​ដែលមាន​កំពស់ ២១ម៉ែត្រ​ដើម្បី​លោត​ចូល​ទឹកទន្លេ Neretva និង​រកបាន​ពិន្ទុ​បំបែក​កំណត់ត្រា​របស់ខ្លួន​ផងដែរ​។​ ​​ចំណែក​ជើងឯក​ពិភពលោក ៤សម័យ​កីឡាការិនី Adriana Jimenez សញ្ជាតិ​ម៉ិ​ក​ស៊ិ​ក​ទទួលបាន​ចំណាត់ថ្នាក់​លេខ២ នៅ​ប្រទេស​បូ​ស្នៀ​នេះ ខណៈ​លេខ៣ បាន​ទៅ​កីឡាការិនី​កាណាដា Jessica Macaulay​។ ​​Rhiannan Iffland នៅពេលនេះ​កំពុង​នាំមុខគេ​ក្នុង​តារាង​ជើងឯក​ពិភពលោក​ដល់​ទៅ ១៤០ពិន្ទុ​។

​​ងាក​មក​ការប្រកួត​ផ្នែក​បុរស Gary Hunt ដែល​មិន​ឈ្នះ​សោះ​នៅក្នុង​ឆ្នាំ២០២១ នេះ ទីបំផុត​រក​ជ័យជំនះ​ដំបូង​របស់ខ្លួន​បាន​នៅ​ទឹកដី​បូ​ស្នៀ និង​ជា​ជ័យជំនះ​លើក​ទី៤០ ក្នុង​អាជីព​នៅ​ព្រឹត្តិការណ៍​លោតទឹក Red Bull Cliff Diving World Series នេះ​។ ​​អ្នក​លេខ២ នៅ​ប្រទេស​បូ​ស្នៀ​នេះ​គឺ​កីឡាករ Nikita Popovici ខណៈ​លេខ៣ គឺ​កីឡាករ​រុស្ស៊ី Nikita Fedotov​។​ ​បន្ទាប់ពី​ទឹកដី​បូ​ស្នៀ Cliff Diving World Series នឹង​បន្តដំណើរ​ទៅ​ទឹកដី​សាធារណរដ្ឋ​អៀក​ឡង់​នៅ​ថ្ងៃទី១២ ខែកញ្ញា​៕

​អត្ថបទ​៖​នាង សុភា​វុ​ធ