បណ្ដារដ្ឋមន្ត្រីហិរញ្ញវត្ថុ និងធនាគារកណ្តាលមកពីក្រុមប្រទេសទាំង២០ ឬ G20 នឹងជួបប្រជុំគ្នា នៅទីក្រុង Rio de Janeiro នាថ្ងៃទី ២៥-២៦ ខែកក្កដា ដើម្បីផ្តោតលើការឈានដល់ការឯកភាពគ្នា ស្ដីពីគោលនយោបាយសេដ្ឋកិច្ច មុនការបោះឆ្នោតនៅសហរដ្ឋអាមេរិក។ ហើយដើម្បីធ្វើឲ្យការចរចាដំណើរការទៅមុខ ពួកគេនឹងចៀសវាងការពិភាក្សាអំពីសង្គ្រាម នៅប្រទេសអ៊ុយក្រែន និងតំបន់ហ្កាហ្សា។ ការសម្រេចនេះធ្វើឡើងបន្ទាប់ពីកិច្ចប្រជុំដែលមិនទទួលបានផ្លែផ្កា នៅក្នុងទីក្រុង Sao Paulo កាលពីខែកុម្ភៈ ដែលការខ្វែងគំនិតគ្នា ជុំវិញជម្លោះទាំងនេះ បានរារាំងមិនឲ្យមានសេចក្តីថ្លែងការណ៍រួម។

វិធីសាស្រ្តថ្មីនេះ មានគោលបំណងផ្តល់អាទិភាពដល់កិច្ចសហប្រតិបត្តិការសេដ្ឋកិច្ច ជុំវិញបញ្ហានានា ដូចជាបម្រែបម្រួលអាកាសធាតុ និងភាពក្រីក្រជាដើម។ ប្រទេសប្រេស៊ីល ដែលជាម្ចាស់ផ្ទះនៃកិច្ចប្រជុំនេះ សង្ឃឹមថា នឹងទទួលបានការគាំទ្រ ចំពោះដំឡើងពន្ធសកលលើអ្នកមានទ្រព្យសម្បត្តិច្រើនបំផុត ដែលជាអាទិភាពសំខាន់ចម្បងនៃតំណែងប្រធាន G20 របស់ខ្លួន។ ហើយដោយការបោះឆ្នោត នៅសហរដ្ឋអាមេរិក លេចឡើងស្ទុងៗ ការបញ្ចប់កិច្ចព្រមព្រៀង មុនកិច្ចប្រជុំចុងក្រោយ នៅខែតុលា កំពុងស្ថិតនៅក្រោមសម្ពាធ។

ប្រេស៊ីលស្វែងរកការគាំទ្រពីប្រទេសផ្សេងទៀត ហើយសង្កត់ធ្ងន់លើការធ្វើឲ្យប្រព័ន្ធពន្ធសកលកាន់តែប្រសើរឡើង។ នេះបង្ហាញពីការផ្លាស់ប្តូរពីយុទ្ធសាស្ត្រពីមុនរបស់ប្រេស៊ីល ដែលបានភ្ជាប់សំណើពន្ធលើមហាសេដ្ឋីទៅនឹងគោលនយោបាយអាកាសធាតុ និងការកាត់បន្ថយភាពក្រីក្រ។

សំណើរបស់ប្រទេសប្រេស៊ីល ដែលត្រូវបានបង្កើតឡើងដោយសេដ្ឋវិទូបារាំង លោក Gabriel Zucman មកពីស្ថាប័នអង្កេតពន្ធសហភាពអឺរ៉ុប (EU) ឯករាជ្យ អំពាវនាវឲ្យមានការយកពន្ធប្រចាំឆ្នាំចំនួន ២ភាគរយលើទ្រព្យសម្បត្តិចំនួនលើសពី ១ពាន់លានដុល្លារ ដែលការយកពន្ធនោះអាចបង្កើនចំណូលរហូតដល់ ២៥០ពាន់លានដុល្លារ ក្នុងមួយឆ្នាំ ពីបុគ្គលអ្នកមានទ្រព្យសម្បត្តិប្រមាណជា ៣.០០០នាក់៕