សារព័ត៌មានក្នុងស្រុក និងគណបក្ស Tehreek-E-Insaaf (PTI)និយាយថា នៅថ្ងៃចន្ទនេះ នគរបាលប៉ាគីស្ថាន បានចាប់ខ្លួនជំនួយការជិតស្និត ២នាក់របស់អតីតនាយករដ្ឋមន្រ្តីជាប់ពន្ធនាគារ Imran Khan អំឡុងការវាយឆ្មក់មួយលើលេខាធិការដ្ឋានគណបក្សរបស់លោក ប៉ុន្តែក្រោយមកពួកគេបានដោះលែងមនុស្សម្នាក់មកវិញ ។

លោក Zulfikar Bukhari គឺជាអ្នកនាំពាក្យគណបក្ស និយាយប្រាប់ទីភ្នាក់ងារព័ត៌មានរ៉យទ័រថា នគរបាល បានឡោមព័ទ្ធលេខាធិការដ្ឋាន ស្ថិតក្នុងទីក្រុង Islamabad ហើយនិងបានឃាត់ខ្លួនអនុប្រធានគណបក្សលោក Gohar Ali Khan និងអ្នកនាំពាក្យគណបក្សលោក Rauf Hasan ។

ក្រុមអ្នកគាំទ្រមួយចំនួន ត្រូវបានគេមើលឃើញនៅក្រៅការិយាល័យគណបក្ស PTI ដោយពួកគេនាំគ្នាស្រែកពាក្យស្លោក ដើម្បីគាំទ្រលោក Imran Khan និងគណបក្សរបស់លោក ។

ក្រោយមកអនុប្រធានគណបក្ស ត្រូវបានដោះលែងវិញ បន្ទាប់ពីឃាត់ខ្លួនរួច ប៉ុន្តែនៅមិនទាន់មានសេចក្តីរាយការណ៍ភ្លាមៗនោះទេថាតើលោក Hasan បន្តស្ថិតនៅក្រោមការឃុំឃាំងឬយ៉ាង ហើយគេក៏ពុំទាន់ដឹងច្បាស់នោះដែរថាតើអ្នកទាំង ២ ត្រូវបានចោទប្រកាន់ឬយ៉ាងណានោះទេ ៕