ក្រុមពន្លត់អគ្គិភ័យ នាថ្ងៃចន្ទ (ទី២២ ខែកក្កដា) នេះ នៅតែប្រឹងប្រែងទប់ទប់ទល់អគ្គិភ័យ នៅឯកំពង់ផែ Hodeida របស់ប្រទេសយេម៉ែន ដែលបានចាប់ផ្តើមឆាបឆេះឡើង បន្ទាប់ពីការវាយប្រហាររបស់អ៊ីស្រាអែល បានធ្លាក់ត្រូវសឺទែនប្រេង និងរោងចក្រថាមពល កាលពីថ្ងៃសៅរ៍ (ទី២០ ខែកក្កដា)។ អណ្ដាតភ្លើង ដែលមិនទាន់រលត់រយៈពេល ៣ថ្ងៃហើយនោះ បន្តបង្កើតបានជាចំហេះយ៉ាងសន្ធោសន្ធៅ និងសំណុំផ្សេងខ្មៅ ដោយធ្វើឲ្យក្ដីបារម្ភមានកាន់តែខ្លាំងថា អគ្គិភ័យអាចរាលដាលដល់កន្លែងស្តុកអាហារ។

រូបភាពតាមរយៈផ្កាយរណបពីក្រុមហ៊ុនព័ត៌មានវិទ្យា Maxar Technologies បង្ហាញឲ្យឃើញពីការខូចខាតយ៉ាងទូលំទូលាយ នៅកន្លែងផ្ទុកប្រេងឥន្ធនៈ។ ក្រុមហ៊ុន Yemen Petroleum បានរាយការណ៍ថា បុគ្គលិករបស់ខ្លួនចំនួន ៦នាក់ បានបាត់បង់ជីវិត នៅក្នុងការវាយប្រហារនេះ ហើយក្រុមហ៊ួទី បានអះអាងថា មនុស្សជាង ៨០នាក់ផ្សេងទៀត បានរងរបួស ដែលភាគច្រើនមានការរលាកធ្ងន់ធ្ងរ។

ពិធីបុណ្យសព សម្រាប់ជនរងគ្រោះត្រូវបានប្រារព្ធឡើងនៅថ្ងៃទី២២ ខែកក្កដានេះ ដោយមានការហែមឈូសតាមដងផ្លូវនៃទីក្រុង Hodeida អមដោយក្បួនរបស់ក្រុមហ៊ួទី។ គួរបញ្ជាក់ថា ការវាយប្រហារដោយអ៊ីស្រាអែល ដែលជាលើកដំបូងលើប្រទេសយេម៉ែននេះ គឺជាការឆ្លើយតបទៅនឹងការវាយប្រហារដោយយានដ្រូនរបស់ក្រុមហ៊ួទីទៅលើទីក្រុង Tel Aviv ដែលបានសម្លាប់មនុស្សម្នាក់។

ទោះបីជាមានការបំផ្លិចបំផ្លាញនេះក៏ដោយ ក៏អាជ្ញាធរក្រុងកំពង់ផែរបស់យេម៉ែន បាននិយាយថា កំពង់ផែ Hodeida កំពុងធ្វើប្រតិបត្តិការយ៉ាងពេញលេញ ដោយធានាថា ការផ្គត់ផ្គង់អាហារ ថ្នាំពេទ្យ និងប្រេង នៅតែមិនមានការរំខានអ្វីឡើយ។ តែទោះជាយ៉ាងណាក្ដី ក្រុមហ៊ុន Navanti Group ដែលមានមូលដ្ឋាននៅសហរដ្ឋអាមេរិក បានកត់សម្គាល់ថា ការវាយប្រហារនេះ បានបំផ្លាញរថយន្តស្ទូចចំនួន ៥គ្រឿង និងកាត់បន្ថយសមត្ថភាពផ្ទុកប្រេងឥន្ធនៈរបស់កំពង់ផែយ៉ាងច្រើន៕