អនុប្រធានាធិបតីអាមេរិក លោកស្រី Kamala Harris បានក្លាយជាប្រធានបទពេញនិយម នៅលើបណ្ដាញសង្គមរបស់ប្រទេសចិន ខណៈដែលអ្នកប្រើប្រាស់បាននាំគ្នាភ្នាល់ថា ការប៉ុនប៉ងរបស់លោកស្រី ដើម្បីចូលក្នុងបញ្ជីបេក្ខជនតំណែងប្រធានាធិបតីរបស់គណបក្សប្រជាធិបតេយ្យអាចនាំឲ្យលោក Donald Trump បានត្រឡប់ទៅអង្គុយសេតវិមានវិញ។

នៅថ្ងៃចន្ទ (ទី២២ ខែកក្កដា) នេះ ការបោះឆ្នោតនៅសហរដ្ឋអាមេរិកបានគ្របដណ្ដប់លើវេទិការបស់បណ្ដាញសង្គម Weibo របស់ចិន ដោយការដកខ្លួនចេញរបស់ប្រធានាធិបតី លោក Joe Biden ពីការប្រកួតប្រជែងឆ្នាំ២០២៤ គឺជាប្រធានបទដ៏ធំបំផុត។ ពាក្យ ឬឃ្លា «Biden Exit» (ការដកខ្លួនរបស់លោក Biden) មានការចូលមើលចំនួន ៣៧០លានដង ត្រឹមថ្ងៃត្រង់ ខណៈដែលប្រធានបទ «លោកស្រី Harris សរសើរលោក Biden» ត្រូវបានចុចចូលមើលចំនួន ៥៧លានដង។

អ្នកប្រើប្រាស់មួយចំនួនបានបង្ហាញពីទំនុកចិត្តពីការមានជ័យជម្នះរបស់លោក Trump ដោយចំនួនជិត ៨០ភាគរយនៃអ្នកចូលរួម ក្នុងការស្ទង់មតិតាមប្រព័ន្ធអ៊ីនធឺណិតជឿថា លោក Trump នឹងផ្ដួលលោកស្រី Harris បានជាមិនខាន ក្នុងការបោះឆ្នោតខែវិច្ឆិកា។ លោកស្រី Harris ដែលបានជួបជាមួយប្រធានាធិបតីចិន លោក ស៊ី ជិនពីង (Xi Jinping) រយៈពេលខ្លីក្នុងឆ្នាំ២០២២ មិនសូវជាមានកេរ្តិ៍ឈ្មោះនោះឡើយ នៅក្នុងប្រទេសចិន បើធៀបនឹងអភិបាលរដ្ឋ California លោក Gavin Newsom ដែលបានទៅទស្សនកិច្ច នៅទីក្រុងប៉េកាំង ក្នុងឆ្នាំ២០២៣ និងទទួលប្រតិកម្មតបជាវិជ្ជមាន។

រូបភាពរបស់លោក Trump ជាពិសេសរូបភាពមួយសន្លឹក ក្នុងចំណោមរូបរបស់លោកដែលគ្រវីដៃ បន្ទាប់ពីត្រូវបានបាញ់ប្រហារនោះ បានធ្វើឲ្យលោកឡើងប្រជាប្រិយភាពយ៉ាងខ្លាំង នៅលើបណ្ដាញសង្គមចិន ដោយមានមនុស្សជាច្រើនសរសើរសភាវគតិនយោបាយរបស់លោក។ ចំណែកបណ្ដាញសារព័ត៌មានរដ្ឋ បានកត់សម្គាល់ពីសក្តានុពលរបស់លោកស្រី Harris ក្នុងការក្លាយជាប្រធានាធិបតីអាមេរិកដំបូងគេ ដែលមានដើមកំណើតអាស៊ី ទោះបីជាមានមនុស្សតិចនាក់ បានពិភាក្សាអំពីផលប៉ះពាល់នៃគោលនយោបាយរបស់លោកស្រី ចំពោះប្រទេសចិនក៏ដោយ៕