ក្រុមគ្រូពេទ្យនៅតំបន់ហ្កាហ្សា បាននិយាយកាលពីថ្ងៃចន្ទ (២២ កក្កដា០ ថា អ៊ីស្រាអែលបានបញ្ជូនរថក្រោះត្រឡប់ទៅតំបន់នៃទីក្រុង ខាន់យូនីស (Khan Younis) វិញ បន្ទាប់ពីបានបញ្ជាឱ្យជម្លៀសក្នុងស្រុកមួយចំនួនដែលខ្លួនបាននិយាយថាត្រូវបានប្រើប្រាស់សម្រាប់ការវាយប្រហារជាថ្មីដោយពួកសកម្មប្រយុទ្ធ ហើយយ៉ាងហោចណាស់ជនជាតិប៉ាឡេស្ទីន ៧០នាក់បានស្លាប់ ដោយសារការបាញ់ប្រហាររបស់អ៊ីស្រាអែល។

ពួកគេបាននិយាយថា ប្រជាជនប៉ាឡេស្ទីនទាំងនោះត្រូវបានសម្លាប់ដោយសាររថក្រោះបើកការបាញ់ប្រហារនៅក្នុងតំបន់ បានី ស៊ូហៃឡា (Bani Suhaila) និងផ្នែកផ្សេងទៀតដែលនៅភាគខាងកើតនៃទីក្រុង ខាន់យូនីស ដោយតំបន់នេះក៏មានការទម្លាក់គ្រាប់បែកពីលើអាកាសផងដែរ។ អ្នកស្រុកនៅតំបន់ហ្កាហ្សាភាគខាងត្បូងដែលមានមនុស្សជ្រកកោនយ៉ាងក្រាស់ក្រែលបាននិយាយថា រថក្រោះបានវាយរុលជាងពីរគីឡូម៉ែត្រ ចូលទៅក្នុងតំបន់ បានី ស៊ូហៃឡា ដោយបង្ខំឱ្យអ្នកស្រុកត្រូវភៀសខ្លួននៅក្រោមគ្រាប់កាំភ្លើង។

ក្រសួងសុខាភិបាលហ្កាហ្សាបាននិយាយថា អ្នកស្លាប់រួមមានស្ត្រី និងកុមារជាច្រើននាក់ ហើយយ៉ាងហោចណាស់មនុស្ស ២០០នាក់ផ្សេងទៀតបានរងរបួស។ ក្រសួងហ្កាហ្សាមិនបែងចែករវាងក្រុមសកម្មប្រយុទ្ធ និងជនស៊ីវិលក្នុងចំនួនអ្នកស្លាប់ទេ។

យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា ការបញ្ជាជម្លៀសនៅតំបន់ ខាន់យូនីស ភាគខាងកើតនេះដោយសារតែមានព័ត៌មានស៊ើបការណ៍ដែលបង្ហាញថា ក្រុមសកម្មប្រយុទ្ធកំពុងបាញ់រ៉ូកែតចេញពីតំបន់ទាំងនោះ ហើយក្រុមហាម៉ាស កំពុងព្យាយាមប្រមូលផ្តុំឡើងវិញ៕