នាយករដ្ឋមន្ត្រីបង់ក្លាដែស លោកស្រី សេក ហាស៊ីណា (Sheikh Hasina) កាលពីថ្ងៃចន្ទ (២២ កក្កដា) បានស្តីបន្ទោសគូប្រជែងនយោបាយរបស់ខ្លួនចំពោះអំពើហិង្សាដ៏បង្ហូរឈាមដែលបានវាយលុកប្រទេស ក្នុងបាតុកម្មដែលដឹកនាំដោយនិស្សិតនាពេលថ្មីៗនេះប្រឆាំងនឹងកូតាក្នុងការងាររដ្ឋាភិបាល ដែលបានសម្លាប់មនុស្សយ៉ាងហោចណាស់ ១៦៣នាក់ ជាង ៥០០នាក់ត្រូវចាប់ខ្លួន និងជាង ១.០០០នាក់របួស ខណៈបម្រាមគោចរនឹងត្រូវដកចេញពេលស្ថានភាពប្រសើរឡើង។

ការលើកឡើងរបស់លោកស្រី Hasina បានកើតឡើងមួយថ្ងៃបន្ទាប់ពីតុលាការកំពូលរបស់ប្រទេសអាស៊ីខាងត្បូងមួយនេះបានយល់ព្រមដកកូតាភាគច្រើននៅក្នុងសេចក្តីសម្រេចមួយកាលពីថ្ងៃអាទិត្យ បន្ទាប់ពីមានការប៉ះទង្គិចគ្នាជាច្រើនថ្ងៃរវាងក្រុមបាតុករ និងកងកម្លាំងសន្តិសុខ ដែលបានជំរុញឱ្យរដ្ឋាភិបាលបិទសេវាអ៊ីនធឺណិត ការដាក់បម្រាមគោចរ និងដាក់ពង្រាយកងទ័ព។

លោកស្រី Hasina វ័យ ៧៦ឆ្នាំបានឈ្នះការបោះឆ្នោតអាណត្តិទី៤ ជាប់គ្នានៅក្នុងខែមករា ក្នុងការបោះឆ្នោតជាតិដែលត្រូវបានធ្វើពហិការដោយគណបក្សប្រឆាំងដ៏សំខាន់។ លោកស្រី Hasina បានស្តីបន្ទោសគណបក្សជាតិនិយមបង់ក្លាដែស (BNP) និងគណបក្ស ចាម៉ាត អ៊ី-អ៊ីស្លាម (Jamaat-e-Islami) និងក្រុមនិស្សិតរបស់ខ្លួនចំពោះអំពើហិង្សាដែលបានចាប់ផ្តើមកាលពីសប្តាហ៍មុន។

គណបក្សទាំងនោះមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ប៉ុន្តែអ្នករិះគន់ រួមទាំងបក្ស BNP ពីមុនបានចោទលោកស្រី Hasina ពីអំណាចផ្តាច់ការ ការរំលោភសិទ្ធិមនុស្ស និងការបង្រ្កាបលើសេរីភាពបញ្ចេញមតិ ប៉ុន្តែរដ្ឋាភិបាលរបស់លោកស្រីបានបដិសេធ៕