ភ្នំពេញ៖ កាល​ពី​ព្រឹកថ្ងៃទី​៣១ ខែ​សីហា ឆ្នាំ២០២១នេះ លោកជំទាវ ពុំ ចន្ទីនី អគ្គ​លេខាធិការ​កាក​បាទ​ក្រហម​កម្ពុជា បាន​ជួប​សំណេះសំណាល និង​ទទួល​អំ​ណោ​យ​​ម៉ាស់​ចំនួន ៤៥០,០០០បន្ទះ ស្មើ​នឹង​ទឹក​ប្រាក់ ១០.០០០ដុល្លារ ពីលោក Chen An អគ្គលេខាធិការ សមាគម​មូល​និធិ​សប្បុរ​ស​ធម៌ក្វាង​ទុងនៅ​កម្ពុជា និង​លោក Chen Jian Shen អនុ​ប្រធានក្រុមហ៊ុន Gold Coast International Development Co., Ltd។ ដែលកម្មវិធីនេះ ប្រព្រឹត្តទៅនៅទីស្នាក់ការ​កណ្តា​លកាកបាទក្រហមកម្ពុជា។

ក្នុង​ឱកាសជួបសំណេះសំណាល និង​ទទួលអំណោយម៉ាស់នោះ លោកជំទាវអគ្គលេខាធិការ បាន​នាំ​យក​ប្រសាសន៍​ផ្តាំផ្ញើ​សួរសុខទុក្ខ​និង​ថ្លែង​អំណរ​គុណ​យ៉ាង​ជ្រាវ​ជ្រៅពីសំណាក់ សម្តេចកិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទ​ក្រហម​កម្ពុជា ដែល​បាន​ឧបត្ថម្ភ​ម៉ាស់ ជូន​មក​កាកបាទក្រហមកម្ពុជា។

ដើម្បី​ឆ្លើយ​តប​ទៅ​នឹង​តម្រូវ​ការចាំបាច់របស់បុគ្គលិក អ្នកស្ម័គ្រចិត្ត និង​យុវជនកាកបាទក្រហមកម្ពុជា ក្នុង​ការ​ចូល​រួម​យ៉ាង​សកម្ម ក្នុង​សកម្មភាព​ផ្សព្វផ្សាយលើ​ក​​កម្ពស់ការយល់​ដឹង​របស់ប្រជាជន​តាម​សហគមន៍ អំពីវិធីការពារខ្លួនពីជំងឺកូវីដ-១៩ ដែល​ជា​ផ្នែក​មួយ​ នៃ​ការ​ចូលរួម​ជា​មួយ​រាជរដ្ឋាភិ​បាល​ក្នុង​ការប្រយុទ្ធប្រឆាំង ក្រោមប្រធានបទ “រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩”។

​អគ្គលេខាធិការ សមាគម​មូលនិធិសប្បុរសធម៌ក្វាងទុងនៅកម្ពុជា លោក Chen An បានថ្លែងអំណរ​គុ​ណ​យ៉ាង​ជ្រាលជ្រៅ ចំពោះ​កាកបាទក្រហមកម្ពុជា ដែល​បាន​អនុញ្ញាត​ឱ្យ​សមាគម​មូល​និធិសប្បុរស​ធម៌​ក្វាង​ទុង​នៅ​កម្ពុជា បាន​ចូលរួម​ចំណែកការងារមនុស្សធម៌មួយនេះ ជា​ពិសេស​ការងារ​ទប់​ការ​រីក​រាល​ដាលជា​មួយកាកបាទក្រហមកម្ពុជា ក៏ដូចជាចូលរួមជាមួយរាជដ្ឋាភិបាលកម្ពុជា ក្នុង​ការទប់​ស្កា​ត់​ការ​រីករាល​ដាលជំងឺកូវីដ-១៩ ប្រទេសកម្ពុជា។

​បន្លែ​ពីលើនោះទៀតដែរ លោកជំទាវ ពុំ ចន្ទីនី បានថ្លែងអំណរគុណយ៉ាងជ្រាលជ្រៅ ចំពោះ​សមាគម​មូល​និធិសប្បុរសធម៌ក្វាងទុង​នៅកម្ពុជា និង​លោក Chen Jian Shen អនុប្រធានក្រុមហ៊ុន Gold Coast International Development Co., Ltd ដែល​បាន​ផ្តល់នូវអំណោយមនុស្សធម៌នេះ ដើម្បី​ចូល​រួម​ចំណែក​ប្រយុទ្ធ​ប្រឆាំងជំងឺ Covid-19 នៅក្នុងប្រទេសកម្ពុជា ដែលទាំងនេះ គឺ​ជា​ទឹកចិត្ត​មិន​កាត់ថ្លៃ​បាន​របស់​សមាគម ក្នុង​ការរួមចំណែកជាមួយកាកបាទក្រហម ក៏ដូចជារាជរដ្ឋាភិបាលកម្ពុជា។

​លោកជំទាវ បាន​មាន​ប្រសាសន៍​ទៀត​ថា បច្ចុប្បន្ន​នេះ កម្ពុជា​កំពុង​តែ​សម្រុកការចាក់វ៉ាក់សាំង ទៅ​ដល់​ប្រជាពលរដ្ឋ ក៏​ដូចជាកុមារ និងយុវវ័យដែល​មាន​អាយុ​ពី​១២​ ដល់ក្រោម១៨ឆ្នាំ ហើយ​តាម​រយៈ​ការ​ផ្ដល់​អំណោយ​ជា​ម៉ាស់​នេះ​នឹង​រួម​ចំណែក​យ៉ាង​សំខាន់ ក្នុង​ការ​អនុវត្តវិធាន​ការ​របស់​រាជរដ្ឋាភិបាល​កម្ពុជា ក្នុង​ការទប់​ស្កាត់​ការចម្លងរាលដាលនៃជំងឺ Covid-19 នៅ​ក្នុងប្រទេសកម្ពុជា។ ជា​ចុង​ក្រោយ​ជំទាវ ក៏​បានជូនពរអោយសមាគម ទទួល​បានភាព​ជោគជ័យ​ក្នុង​ការងារ​របស់​ខ្លួន​ជា​បន្តបន្ទាប់​ទៀត​នា​ពេលខាងមុខ៕ អត្ថបទ៖ សំ ងីម​