ទីភ្នាក់ងារអាកាសធាតុរបស់ប្រទេសជប៉ុនបាននិយាយថា សីតុណ្ហភាពក្ដៅខ្លាំងកំពុងបន្តនៅទូទាំងប្រទេសនេះកាលពីថ្ងៃចន្ទខណៈសីតុណ្ហភាពឡើងដល់ជាង ៣៧ អង្សាសេ នៅតំបន់មួយចំនួននៅពេលព្រឹក។

ទីភ្នាក់ងារឧតុនិយមជប៉ុន (JMA) បាននិយាយថា ពន្លឺព្រះអាទិត្យខ្លាំងបានចាប់ផ្តើមរុញសីតុណ្ហភាពនៅទូទាំងប្រទេសចាប់ពីពេលព្រឹក ខណៈមានការជូនដំណឹងអំពីជំងឺសុរិយរោគ ឬជំងឺបណ្ដាលមកពីក្ដៅខ្លាំង សម្រាប់ខេត្តចំនួន៣៩ ក្នុងចំណោមខេត្ត ៤៧។

ទិន្នន័យរបស់ទីភ្នាក់ងារអាកាសធាតុបានបង្ហាញថា ត្រឹមម៉ោង១១:៣០នាទីព្រឹក ម៉ោងក្នុងស្រុក សីតុណ្ហភាពក្ដៅបានឡើងដល់៣៧,៥ អង្សាសេ នៅទីក្រុង ដៃហ្គោ (Daigo) ខេត្ត អាយបារ៉ាឃី (Ibaraki) ៣៧,៤ អង្សាសេ នៅទីក្រុង ហាម៉ាម៉ាត់ស៊ូ (Hamamatsu)ខេត្ត ហ្ស៊ីហ្ស៊ូកា (Shizuoka ) និង ៣៦,១អង្សាសេ នៅកណ្តាលទីក្រុងតូក្យូ។

នាយកដ្ឋានពន្លត់អគ្គិភ័យទីក្រុងតូក្យូបានរាយការណ៍ថាកាលពីថ្ងៃចន្ទបុគ្គលចំនួន ៨០ នាក់ត្រូវបានបញ្ជូនទៅមន្ទីរពេទ្យដោយសារជំងឺក្ដៅខ្លាំង ក្នុងនោះមានពីរនាក់មានស្ថានភាពធ្ងន់ធ្ងរ។ គិតត្រឹមម៉ោង៩យប់ កាលពីថ្ងៃទី ២០ ខែកក្កដា មានករណីជំងឺសុរិយរោគចំនួន ១៧១នាក់ត្រូវបានកត់ត្រានៅក្នុងតំបន់និងទីក្រុងមួយចំនួន៕