ទូរទស្សន៍រដ្ឋបាននិយាយកាលពីថ្ងៃចន្ទ (២២ កក្កដា) ថា រាល់ភារកិច្ចទាំងអស់របស់ប្រធានាធិបតីមានតែឈ្មោះរបស់មីយ៉ាន់ម៉ា ត្រូវបានផ្ទេរទៅឱ្យប្រមុខរបបសឹកដែលកំពុងកាន់អំណាចគឺលោក មីន អ៊ុងល៉ាំង (Min Aung Hlaing) បន្ទាប់ពីលោក ម្យិន ស្វេ (Myint Swe) ប្រមុខរដ្ឋដែលត្រូវបានតែងតាំង ត្រូវសម្រាកព្យាបាលនៅមន្ទីរពេទ្យបន្ទាប់ពីមានជំងឺរ៉ាំរ៉ៃ។

មីយ៉ាន់ម៉ា បានធ្លាក់ចូលក្នុងភាពវឹកវរចាប់តាំងពីខែកុម្ភៈ ឆ្នាំ២០២១មក នៅពេលដែលយោធាដឹកនាំដោយលោក មីន អ៊ុងល៉ាំង បានបណ្តេញរដ្ឋាភិបាលស៊ីវិលជាប់ឆ្នោតនៅក្នុងរដ្ឋប្រហារ ដោយបង្កឱ្យមានរលកនៃការតវ៉ាដែលបានប្រែទៅជាការបះបោរប្រដាប់អាវុធទូទាំងប្រទេសប្រឆាំងនឹងរបបសឹក។

ទូរទស្សន៍រដ្ឋ MRTV បាននិយាយកាលពីថ្ងៃចន្ទថា «ការិយាល័យប្រធានាធិបតីបណ្តោះអាសន្នបានផ្ញើលិខិតមួយទៅកាន់ការិយាល័យក្រុមប្រឹក្សារដ្ឋបាលរដ្ឋ ដោយជូនដំណឹងដើម្បីធ្វើប្រតិភូកម្មភារកិច្ចរបស់ខ្លួន» ដោយសំដៅលើក្រុមប្រឹក្សាគាំទ្រដោយយោធាដែលដឹកនាំដោយលោក មីន អ៊ុងល៉ាំង។

ទោះជាលោក ម្យិន ស្វេ វ័យ ៧៣ឆ្នាំ គ្រាន់តែជាប្រធានាធិបតីមានតែឈ្មោះក៏ដោយ ក៏របបសឹកបានពឹងផ្អែកលើលោកក្នុងការចុះហត្ថលេខាលើក្រឹត្យ និងផ្តល់នូវភាពស្របច្បាប់នៃការគ្រប់គ្រងរបស់ខ្លួន ដែលកំពុងតែជួបការលំបាកក្នុងការទប់ស្កាត់សង្គ្រាមស៊ីវិលដ៏រីករាលដាល និងគ្រប់គ្រងសេដ្ឋកិច្ចដែលដួលរលំក្នុងប្រទេស៕