ប្រធានាធិបតីអ៊ុយក្រែន លោក Volodymyr Zelenskyy បានបង្ហាញពីបំណងរបស់លោក ក្នុងការពន្លឿនកិច្ចខិតខំប្រឹងប្រែង ដើម្បីចុះហត្ថលេខាលើកិច្ចព្រមព្រៀងសន្តិសុខថ្មី ជាមួយប្រទេសជាច្រើន ឱ្យបានឆាប់តាមដែលអាចធ្វើទៅបាន។

នៅក្នុងសារវីដេអូ ដែលបានចេញផ្សាយកាលពីថ្ងៃចន្ទ លោក Zelenskyy បាននិយាយថា មិនថាមានអ្វីកើតឡើងនៅលើពិភពលោកនោះទេ អ៊ុយក្រែនត្រូវការយុទ្ធោបករណ៍ផ្ទាល់ខ្លួនដើម្បីគាំទ្រប្រជាជន និងរដ្ឋ ព្រមទាំងកិច្ចព្រមព្រៀងសន្តិសុខ ដែលនឹងដំណើរការក្រោមលក្ខខណ្ឌ ណាមួយ។

លោកបាននិយាយថា ក្រុមរបស់លោក កំពុងរៀបចំកិច្ចព្រមព្រៀងសន្តិសុខថ្មីចំនួនបួន សម្រាប់អ៊ុយក្រែន ហើយនឹងចាប់ផ្តើមការចរចាក្នុងពេលឆាប់ៗនេះ។

លោក Zelenskyy បាននិយាយបន្ថែមថាអ៊ុយក្រែន នឹងមានកិច្ចព្រមព្រៀងបែបនេះជិត៣០ ជាមួយដៃគូរបស់ខ្លួន។

លោក បាននិយាយលើកឡើងជាក់ស្តែង ដោយយកមកពិចារណាពីលទ្ធភាព ដែលបេក្ខជនប្រធានាធិបតី មកពីគណបក្សសាធារណរដ្ឋ លោក Donald Trump ទទួលជ័យជម្នះក្នុងការបោះឆ្នោតនៅក្នុងខែវិច្ឆិកា ខាងមុខនេះ។

ប្រព័ន្ធផ្សព្វផ្សាយអ៊ុយក្រែន រាយការណ៍ថា ទីក្រុងគីវ បានចុះហត្ថលេខារួចហើយលើកិច្ចព្រមព្រៀងសន្តិសុខចំនួន ១៧ច្បាប់ រួមទាំងកិច្ចព្រមព្រៀងជាមួយចក្រភពអង់គ្លេស និងជប៉ុន កាលពីពាក់កណ្តាលខែមិថុនា។