អ្នកនាំពាក្យក្រសួងការបរទេសចិន អ្នកស្រី Mao Ning បាននិយាយថា ប្រទេសចិន នឹងបន្តកិច្ចខិតខំប្រឹងប្រែងការទូតរបស់ខ្លួន ដើម្បីលើកកម្ពស់ការបង្រួបបង្រួមនៃកម្លាំងនយោបាយ នៅប៉ាឡេស្ទីន។

អ្នកស្រី បាននិយាយថា៖«ប្រទេសចិនតែងតែគាំទ្រផ្លូវត្រូវរបស់ប្រជាជនប៉ាឡេស្ទីន ឆ្ពោះទៅរកការស្ដារឡើងវិញនូវសិទ្ធិជាតិស្របច្បាប់របស់ខ្លួន។ យើងតែងតែគាំទ្រក្រុមប្រឆាំងប៉ាឡេស្ទីនទាំងអស់ នៅក្នុងបំណងប្រាថ្នារបស់ពួកគេសម្រាប់ការផ្សះផ្សាតាមរយៈការសន្ទនា និងការពិគ្រោះយោបល់។ យើងតែងតែគាំទ្រប៉ាឡេស្ទីន ក្នុងសេចក្តីប្រាថ្នា ដើម្បីឯកភាព និងឯករាជ្យភាព»។ «ចិនបានចំណាយកម្លាំងមិនតិចទេក្នុងតំបន់នេះ ហើយនឹងបន្តធ្វើកិច្ចការនេះ»។

ទោះជាយ៉ាងណាក៏ដោយ អ្នកស្រី Mao Ning មិនបានផ្តល់ព័ត៌មានលម្អិតបន្ថែមអំពីកិច្ចប្រជុំដ៏មានសក្តានុពលនៃក្រុមប្រឆាំងប៉ាឡេស្ទីន នៅទីក្រុងប៉េកាំងនោះទេ។

មន្ត្រីជាន់ខ្ពស់ក្រុមហាម៉ាស លោក Husam Badran បាននិយាយមុននេះថា ក្រុមហាម៉ាស នឹងចូលរួមក្នុងកិច្ចប្រជុំនៃក្រុមប្រឆាំងប៉ាឡេស្ទីន ដែលត្រូវបានគេរំពឹងថា នឹងធ្វើឡើងនៅក្នុងរដ្ឋធានីរបស់ប្រទេសចិន នៅចុងខែកក្កដានេះ។