អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយកាលពីថ្ងៃចន្ទថា ប្រសិនបើអឺរ៉ុប ទទួលយកវិធីសាស្រ្តឯករាជ្យចំពោះគោលនយោបាយការបរទេសរបស់ខ្លួន ទំនាក់ទំនងរបស់ខ្លួនជាមួយទីក្រុងតេអេរ៉ង់ នឹងល្អប្រសើរឡើង។

លោក បានលើកឡើងនៅក្នុងសន្និសិទសារព័ត៌មានប្រចាំសប្តាហ៍ ខណៈពេលកំពុងធ្វើអត្ថាធិប្បាយអំពី ប្រតិកម្ម«មិនស្មោះត្រង់»របស់អឺរ៉ុប និងសហរដ្ឋអាមេរិកចំពោះការបោះឆ្នោតរបស់លោក Masoud Pezeshkian ជាប្រធានាធិបតីទី៩ របស់ប្រទេសអ៊ីរ៉ង់។ នេះបើយោងតាមទីភ្នាក់ងារសារព័ត៌មាន Tasnim ពាក់កណ្តាលផ្លូវការ។

លោក Kanaani បានថ្លែងថា អ៊ីរ៉ង់បានចាត់ទុកអឺរ៉ុប ជាតំបន់សំខាន់មួយនៅក្នុងទំនាក់ទំនងការបរទេសរបស់ខ្លួន ដោយកត់សម្គាល់ថា៖«បរិយាកាសដ៏អាប់អួរ» ដែលធ្វើទំនាក់ទំនងទ្វេភាគី ស្ថិតក្នុងចំណោមផលវិបាកនៃ«ការប៉ានស្មានខុស» របស់អឺរ៉ុបចំពោះអ៊ីរ៉ង់ ឬការទទួលយកសម្ពាធរបស់សហរដ្ឋអាមេរិក។

ដោយប្រតិកម្មទៅនឹងការដកខ្លួនរបស់លោក ចូ បៃដិន ពីការប្រជែងតំណែងប្រធានាធិបតីអាមេរិក លោក Kanaani បាននិយាយថា ការផ្លាស់ប្តូររដ្ឋបាលនៅសហរដ្ឋអាមេរិក មិនសំខាន់ចំពោះអ៊ីរ៉ង់ទេ ដោយសង្កត់ធ្ងន់ថា អ្វីដែលសំខាន់គឺ «គោលនយោបាយអរិភាព»របស់សហរដ្ឋអាមេរិកចំពោះអ៊ីរ៉ង់។

លោក Pezeshkian ត្រូវបានប្រកាសជាប្រធានាធិបតី បន្ទាប់របស់អ៊ីរ៉ង់ នៅថ្ងៃទី ៦ ខែកក្កដា បន្ទាប់ពីជ័យជម្នះរបស់លោក នៅក្នុងការប្រជែងជាមួយនឹង លោក Saeed Jalili ដែលជាអតីតប្រធានអ្នកចរចានុយក្លេអ៊ែរ។