នាយកប្រតិបត្តិក្រុមហ៊ុនអាកាសចរណ៍ Delta Air Lines គឺលោក Ed Bastian កាលពីថ្ងៃចន្ទ (ទី២២ ខែកក្កដា) បានប្រាប់ឲ្យដឹងថា ការរំខានជើងហោះហើរ ដោយសារការដាច់ប្រព័ន្ធអ៊ីនធឺណិតសកល នឹងមានរយៈពេល ២-៣ថ្ងៃទៀត។

គួរបញ្ជាក់ថា ការគាំងប្រព័ន្ធ IT ដែលបណ្តាលមកពីការអាប់ដេត (ការធ្វើបច្ចុប្បន្នភាព) កម្មវិធីរបស់ក្រុមហ៊ុនសន្តិសុខអ៊ីនធឺណិត CrowdStrike បាននាំឲ្យក្រុមហ៊ុនអាកាសចរណ៍ដែលមានមូលដ្ឋាននៅទីក្រុង Atlanta នេះ លុបចោលជើងហោះហើរជាង ៤.០០០វ៉ុល គិតចាប់តាំងពីថ្ងៃសុក្រ (ទី១៩ ខែកក្កដា) ដោយបានធ្វើឲ្យអ្នកដំណើររាប់ពាន់នាក់ខកដំណើររបស់ខ្លួន។ ត្រឹមតែនៅថ្ងៃចន្ទនេះ ក្រុមហ៊ុន Delta បានលុបចោលជើងហោះហើរជាង ៨០០វ៉ុល ដែលស្មើនឹង ២១ភាគរយនៃកាលវិភាគហោះហើររបស់ខ្លួន។

ការដំណើរការឡើងវិញរបស់ក្រុម Delta គឺយឺតជាងក្រុមហ៊ុនអាកាសចរណ៍ផ្សេងទៀត ដោយប្រព័ន្ធសំខាន់ៗ ជាពិសេសប្រព័ន្ធតាមដាននាវិក ត្រូវការការជួសជុលដោយដៃ និងធ្វើឲ្យប្រព័ន្ធទាំងអស់ដំណើរការដំណាលគ្នា។ លោក Bastian បានធានាដល់និយោជិតថា ប្រតិបត្តិការកំពុងប្រសើរឡើងបណ្ដើរៗរាល់ថ្ងៃ ដោយមានគោលបំណងឲ្យមានដំណើរការផ្នែកសំខាន់ នៅពាក់កណ្តាលសប្តាហ៍។

លោកបានប្រាប់ទៀតថា ការដាច់ប្រព័ន្ធអ៊ិនធឺណិត បានកើតឡើងក្នុងអំឡុងពេលមានការធ្វើដំណើរដ៏មមាញឹកបំផុត នៅចុងសប្តាហ៍នៃរដូវក្តៅ ដោយមានកម្រិតលើសពីបណ្តាញជំនួយរបស់ក្រុមហ៊ុន Delta និងធ្វើឲ្យអតិថិជនខកចិត្ត ដែលពួកគេភាគច្រើនត្រូវរង់ចាំជាច្រើនម៉ោង ដើម្បីបានជំនួយ ឬស្វែងរកមធ្យោបាយធ្វើដំណើរផ្សេងជំនួស។ 

លោក Bastian បន្ថែមថា ក្រុមហ៊ុនកំពុងជំរុញឲ្យបុគ្គលិកស្ម័គ្រចិត្ត សម្រាប់ការធ្វើដំណើរបន្ថែម និងបានបង្កើនប្រាក់លើកទឹកចិត្តសម្រាប់អ្នកបើកយន្តហោះ និងអ្នកបម្រើលើយន្តហោះ ដើម្បីរក្សាស្ថិរភាពបុគ្គលិក៕