នគរបាលប្រទេសឥណ្ឌូណេស៊ី បាននិយាយនៅថ្ងៃអង្គារទី២៣ ខែកក្កដា នេះថា ពួកគេបានចាប់ខ្លួនស្ត្រីម្នាក់នៅក្នុងទីក្រុងហ្សាកាតា ដែលជាប់ពាក់ព័ន្ធក្នុងប្រតិបត្តិការជួញដូរមនុស្ស៥០នាក់ ទៅកាន់ទីក្រុងស៊ីដនី ប្រទេសអូស្ត្រាលី ដើម្បីឲ្យបម្រើផ្លូវភេទ។

ប្រធាននាយកដ្ឋានស៊ើបអង្កេតនគរបាលជាតិ ប្រទេសឥណ្ឌូណេស៊ី បាននិយាយនៅក្នុងសន្និសីទសារព័ត៌មានថា នគរបាលសហព័ន្ធអូស្ត្រាលី (AFP)បានបញ្ជាក់ថា ស្ត្រីរូបនេះ ត្រូវបានគេរាយការណ៍ថា បានជ្រើសរើសជនរងគ្រោះ រួមទាំងយ៉ាងហោចណាស់ស្រ្តីម្នាក់មានអាយុ១៧ឆ្នាំ និងបានរៀបចំឯកសារធ្វើដំណើររបស់ពួកគេ មុនពេលប្រគល់ទៅឱ្យបុរសជនជាតិអូស្ត្រាលីម្នាក់ អាយុ៤៣ឆ្នាំ នៅទីក្រុងស៊ីដនី។ 

នគរបាលសហព័ន្ធអូស្ត្រាលី (AFP)បានចោទប្រកាន់បុរសនោះ នៅថ្ងៃអង្គារនេះ ពីបទជួញដូរកុមារមួយករណី ដែលត្រូវកាត់ទោសឲ្យជាប់ពន្ធនាគារអតិបរមា ២៥ ឆ្នាំ។

នគរបាលប្រទេសអូស្ត្រាលី កាលពីខែឧសភា បានរកឃើញស្ត្រី៩នាក់នៅក្នុងផ្ទះបនចំនួនបីកន្លែង នៅទូទាំងទីក្រុងស៊ីដនី ដែលជាប់ពាក់ព័ន្ធក្នុងសកម្មភាពបម្រើផ្លូវភេទ ដោយបំពានលើលក្ខខណ្ឌទិដ្ឋាការរបស់ពួកគេ។