គណៈកម្មាធិការសភាសហរដ្ឋអាមេរិកបានកោះអញ្ជើញឲ្យនាយកប្រតិបត្តិរបស់ក្រុមហ៊ុន CrowdStrike Holdings ផ្តល់សក្ខីកម្ម ជុំវិញកំហុសនៃការអាប់ដេត (ការធ្វើបច្ចប្បន្នភាព) កម្មវិធី ដែលបណ្តាលមានការដាច់ប្រព័ន្ធ IT (បច្ចេកវិទ្យាព័ត៌មានវិទ្យា) ទូទាំងពិភពលោក។

គណៈកម្មាធិការសភា ស្តីពីសន្តិសុខមាតុភូមិ បានស្នើសុំឲ្យនាយកប្រតិបត្តិលោក George Kurtz បង្ហាញខ្លួន ហើយស្ថាប័នបានស្នើសុំឲ្យក្រុមហ៊ុន CrowdStrike កំណត់កាលបរិច្ឆេទភ្លាមៗ។

នៅក្នុងលិខិតមួយផ្ញើទៅកាន់លោក Kurtz កាលពីថ្ងៃចន្ទ (ទី២២ ខែកក្កដា) ប្រធានគណៈកម្មាធិការ និងជាសមាជិកគណបក្សសាធារណរដ្ឋ ប្រចាំរដ្ឋ Tennessee គឺលោក Mark Green ព្រមទាំងតំណាងលោក Andrew Garbarino សមាជិកគណបក្សសាធារណរដ្ឋ ប្រចាំរដ្ឋ New York និងជាប្រធានអនុគណៈកម្មាធិការនៃក្រុមប្រឹក្សាភិបាល ស្តីពីសន្តិសុខអ៊ីនធឺណិត និងការការពារហេដ្ឋារចនាសម្ព័ន្ធ បានសេរសេររៀបរាប់ថា «ក្នុងរយៈពេលមិនដល់មួយថ្ងៃ យើងបានឃើញផលប៉ះពាល់ធំៗ ចំពោះមុខងារសំខាន់ៗនៃសេដ្ឋកិច្ចពិភពលោក ដែលរួមមានវិស័យអាកាសចរណ៍ ការថែទាំសុខភាព ធនាគារ ប្រព័ន្ធផ្សព្វផ្សាយ និងសេវាសង្គ្រោះបន្ទាន់»។

អ្នកទាំង២ បានសរសេរទៀតថា៖ «ដោយទទួលស្គាល់ថា ច្បាស់ណាស់ ជនជាតិអាមេរិកពិតជានឹងមានអារម្មណ៍ថា ជួបនូវផលវិបាកជាក់ស្ដែងដែលកំពុងបន្តមានពីឧប្បត្តិហេតុនេះ ពួកគេសមនឹងបានដឹងលម្អិតអំពីរបៀបដែលឧប្បត្តិហេតុនេះ បានកើតឡើង និងវិធានការកាត់បន្ថយ ដែលក្រុមហ៊ុន CrowdStrike កំពុងដំណើរការ»។

អ្នកនាំពាក្យរបស់ក្រុមហ៊ុន CrowdStrike កាលពីល្ងាចថ្ងៃទី២២ ខែកក្កដា បានប្រាប់ថា ក្រុមហ៊ុនកំពុងពិភាក្សាជាមួយគណៈកម្មាធិការសភា ដែលមានអំណាចក្នុងការបង្ខំឲ្យមានការផ្តល់សក្ខីកម្ម ដោយការចេញដីកាកោះហៅ ប៉ុន្តែជាធម្មតាស្នើសុំជាដំបូងឲ្យសាក្សីដែលមានសក្តានុពល បង្ហាញខ្លួនដោយស្ម័គ្រចិត្ត៕