ក្រុមប្រឆាំងប៉ាឡេស្ទីនជាច្រើន រួមទាំងក្រុមហាម៉ាស និងគូប្រជែងក្រុមហ្វាតា ( Fatah) បានចុះហត្ថលេខាលើកិច្ចព្រមព្រៀង «ឯកភាពជាតិ» នៅទីក្រុងប៉េកាំង នៅថ្ងៃអង្គារនេះ ដើម្បីបញ្ចប់ការបែកបាក់របស់ពួកគេ និងបង្កើតវេទិកាមួយដែលពួកគេអាចរួមគ្នាគ្រប់គ្រងតំបន់ហ្កាហ្សាក្រោយសង្គ្រាម។

មន្ត្រីជាន់ខ្ពស់ក្រុមហាម៉ាស លោក Musa Abu Marzuk បានប្រាប់អ្នកយកព័ត៌មានថា៖«ថ្ងៃនេះ យើងបានចុះហត្ថលេខាលើកិច្ចព្រមព្រៀងមួយសម្រាប់ការរួបរួមជាតិ ហើយយើងនិយាយថា មាគ៌ាដើម្បីបញ្ចប់ការធ្វើដំណើរនេះ គឺជាឯកភាពជាតិ»។ នេះបើយោងតាមប្រព័ន្ធផ្សព្វផ្សាយរដ្ឋចិន។ 

លោក Abu Marzuk បាននិយាយថា៖«យើងប្តេជ្ញាចិត្ត ដើម្បីឯកភាពជាតិ ហើយយើងអំពាវនាវឲ្យមានឯកភាពជាតិ»។

ការចុះហត្ថលេខាលើកិច្ចព្រមព្រៀងនេះ បានបញ្ចប់រយៈពេលបីថ្ងៃនៃកិច្ចសន្ទនាការផ្សះផ្សារវាងក្រុមប៉ាឡេស្ទីនចំនួន ១៤ នៅក្នុងរដ្ឋធានីរបស់ប្រទេសចិន។

រដ្ឋមន្ត្រីការបរទេសចិនលោក វ៉ាង យី (Wang Yi) បានពណ៌នាកិច្ចព្រមព្រៀងថា ជាកិច្ចព្រមព្រៀងមួយដើម្បីគ្រប់គ្រងតំបន់ហ្កាហ្សាស្ទ្រីបជាមួយគ្នា នៅពេលដែលសង្រ្គាមដែលកំពុងបន្តនេះ ត្រូវបានបញ្ចប់។