គណបក្សអភិរក្សនិយមរបស់ចក្រភពអង់គ្លេស កាលពីថ្ងៃចន្ទ (ទី២២ ខែកក្កដា) បានប្រាប់ឲ្យដឹងថា ខ្លួននឹងប្រកាសពីប្រធានគណបក្សថ្មី នៅថ្ងៃទី២ ខែវិច្ឆិកា បន្ទាប់ពីការបរាជ័យ នៅក្នុងការបោះឆ្នោតជាប្រវត្តិសាស្ត្រមួយ កាលពីដើមខែកក្កដា បានជំរុញឲ្យអតីតនាយករដ្ឋមន្ត្រី លោក Rishi Sunak ប្រកាសលាលែងពីតំណែង។

ការបោះឆ្នោតរបស់អង់គ្លេស បានបញ្ចប់យ៉ាងគួរឲ្យភ្ញាក់ផ្អើលនូវរយៈពេល ១៤ឆ្នាំនៃការកាន់អំណាចរបស់គណបក្សអភិរក្សនិយម ដោយកាត់បន្ថយអាសនៈសមាជិកសភារបស់គណបក្សមកនៅត្រឹម ១២១អាសនៈ ដែលជាលទ្ធផលដ៏អាក្រក់បំផុតមិនធ្លាប់មាន ខណៈដែលគណបក្សប្រឆាំងឆ្វេងនិយមកណ្ដាល គឺគណបក្សការងារ ទទួលបានជ័យជម្នះយ៉ាងលើសលប់ ជាមួយនឹងសំឡេងភាគច្រើន ១៧៤អាសនៈ។

ការប្រកួតប្រជែងភាពជាអ្នកដឹកនាំ ត្រូវបានគេមើលឃើញថា មានសារៈសំខាន់ នៅពេលដែលមន្ទិលសង្ស័យ កើតមានឡើងនៅជុំវិញទិសដៅអនាគតរបស់ Tory (គណបក្សអភិរក្សនិយម)។

នៅមិនទាន់មានបេក្ខជនណាម្នាក់ បានដាក់ឈ្មោះរបស់ពួកគេជាផ្លូវការនោះទេ ប៉ុន្តែមានឥស្សរជនជាច្រើនត្រូវបានគេប្រាប់អស់រយៈពេលជាច្រើនខែមកហើយថា ជាអ្នកមានសក្តានុពលក្នុងការមកជំនួសតំណែងរបស់លោក Sunak។ ក្នុងចំណោមអ្នកទាំងនោះ មានអតីតរដ្ឋមន្ត្រីពាណិជ្ជកម្មលោកស្រី Kemi Badenoch អតីតរដ្ឋមន្ត្រីរឹងត្អឹងនៅក្រសួងមហាផ្ទៃ លោកស្រី Suella Braverman អតីតអ្នកការទូតជាន់ខ្ពស់របស់អង់គ្លេស លោក James Cleverly និងអតីតរដ្ឋមន្ត្រីអន្តោប្រវេសន៍ លោក Robert Jenrick។

គណៈកម្មាធិការឆ្នាំ១៩២២ របស់គណបក្ស ដែលទទួលបន្ទុករៀបចំផ្ទៃក្នុងរបស់បក្ស បានកំណត់ច្បាប់នៃការប្រកួតប្រជែង ដោយបេក្ខជនអាចប្រកាសការស្នើរបស់ពួកគេ រហូតដល់ថ្ងៃទី២៩ ខែកក្កដា។ បន្ទាប់មក សមាជិកសភារបស់គណបក្សអភិរក្សនិយមចំនួន ១២១រូប នឹងបោះឆ្នោត ២ដង ដើម្បីកាត់បន្ថយគូប្រជែងឲ្យសល់តែបេក្ខជន ២រូបចុងក្រោយ ដោយសមាជិកគណបក្សនឹងសម្រេចអ្នកឈ្នះ អំឡុងពេលបោះឆ្នោតតាមប្រព័ន្ធអ៊ីនធឺណិតក្នុងខែតុលា។ លទ្ធផលចុងក្រោយនឹងត្រូវប្រកាសនៅថ្ងៃទី២ វិច្ឆិកា៕