ក្រសួងការបរទេសកូរ៉េខាងត្បូង បាននិយាយកាលពីថ្ងៃអង្គារថា ប្រេសិតនុយក្លេអ៊ែររងរបស់កូរ៉េខាងត្បូង លោក Lee Joon-il បានជួបជាមួយមន្ត្រីជាន់ខ្ពស់អាមេរិកទទួលបន្ទុកគោលនយោបាយកូរ៉េខាងជើង នៅរដ្ឋធានីវ៉ាស៊ីនតោន ដើម្បីពិភាក្សាអំពីវិធានការប្រឆាំងនឹងការបង្កហេតុរបស់កូរ៉េខាងជើង។

ក្រសួង បាននិយាយនៅក្នុងការចេញផ្សាយមួយថា ជំនួបរវាងលោក Lee និងលោក Seth Bailey តំណាងពិសេសរបស់កូរ៉េខាងជើងនៅក្រសួងការបរទេសសហរដ្ឋអាមេរិក បានធ្វើឡើងកាលពីថ្ងៃចន្ទ (ម៉ោងក្នុងតំបន់)។

ភាគីទាំងពីរ បានថ្កោលទោសការបង្ហោះបាឡុងផ្ទុកសំរាមនាពេលថ្មីៗនេះរបស់កូរ៉េខាងជើង និងការប៉ុនប៉ងរបស់ខ្លួន ក្នុងការបិទសញ្ញា GPS ជុំវិញកោះព្រំដែនភាគពាយ័ព្យរបស់ប្រទេសកូរ៉េខាងត្បូង ដោយជំរុញឲ្យរបបផ្តាច់មុខត្រឡប់ទៅតុចរចាវិញ។

ក្រសួងបាននិយាយថា មន្ត្រីទាំងពីរ ក៏បានព្រមព្រៀងគ្នាក្នុងការរៀបចំយ៉ាងហ្មត់ចត់សម្រាប់រាល់លទ្ធភាព បង្កហេតុដោយកូរ៉េខាងជើង និងឆ្លើយតបយ៉ាងម៉ឺងម៉ាត់ ដោយផ្អែកលើភាពរឹងមាំរបស់កូរ៉េខាងត្បូង-អាមេ  រិក។ 

ពួកគេ ក៏បានសម្តែងការព្រួយបារម្ភអំពីកិច្ចសហប្រតិបត្តិការយោធា និងសេដ្ឋកិច្ចដែលកំពុងបន្តរវាងកូរ៉េខាងជើង និងរុស្ស៊ី រួមទាំងប្រតិបត្តិការអាវុធ និងការផ្គត់ផ្គង់ប្រេងចម្រាញ់រួច ដែលបំពានលើសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ។