ក្រុមអ្នកស្រាវជ្រាវ នៅថ្ងៃអង្គារ (ទី២៣ ខែកក្កដា) បានប៉ាន់ស្មានថា ថ្នាំ HIV ថ្មី «ស្រដៀងនឹងវ៉ាក់សាំង» ឈ្មោះ Lenacapavir ដែលបច្ចុប្បន្នមានតម្លៃជាង ៤០.០០០ដុល្លារ ក្នុង ១ឆ្នាំ សម្រាប់មនុស្សម្នាក់ អាចត្រូវចំណាយត្រឹមតែ ៤០ដុល្លារប៉ុណ្ណោះ។ តាមរយៈការសាកល្បងដំបូង ថ្នាំដែលត្រូវបានផលិតឡើងដោយក្រុមហ៊ុនឧសថ Gilead របស់អាមេរិក បានបង្ហាញប្រសិទ្ធភាព ១០០ភាគរយ ក្នុងការការពារការឆ្លងមេរោគ HIV ហើយតម្រូវឲ្យចាក់តែ ២ដងប៉ុណ្ណោះ ក្នុង ១ឆ្នាំ ដែលធ្វើឲ្យមានភាពងាយស្រួលប្រើប្រាស់ជាងថ្នាំគ្រាប់ប្រចាំថ្ងៃបច្ចុប្បន្ន។

នៅឯសន្និសីទអន្តរជាតិ ស្ដីអំពីជំងឺអេដស៍ នៅទីក្រុង Munich ប្រទេសអាល្លឺម៉ង់ នៅថ្ងៃទី២៣ ខែកក្កដា វេជ្ជបណ្ឌិត លោក Andrew Hill មកពីសាកលវិទ្យាល័យ Liverpool ចក្រភពអង់គ្លេស បានធ្វើបទបង្ហាញពីការស្រាវជ្រាវដែលបង្ហាញថា ប្រសិនបើថ្នាំប្រភេទធម្មតាមានតម្លៃថោក ត្រូវបានផលិត នោះការចំណាយអាចធ្លាក់ចុះយ៉ាងខ្លាំង។ ការប៉ាន់ប្រមាណនោះ គឺផ្អែកលើការផលិតថ្នាំគ្រប់គ្រាន់ ដើម្បីព្យាបាលមនុស្ស ១០លាននាក់។

លោកវេជ្ជបណ្ឌិត Hill បានកត់សម្គាល់ថា ការផលិតឱសថមានតម្លៃសមរម្យ និងរកបានយ៉ាងទូលំទូលាយ អាចកាត់បន្ថយការចម្លងមេរោគ HIV បានយ៉ាងច្រើន និងជួយគ្រប់គ្រងការរីករាលដាល។ ការព្យាករណ៍ពីមុនរបស់អ្នកស្រាវជ្រាវអំពីតម្លៃថ្នាំ បានបង្ហាញឲ្យឃើញនូវភាពត្រឹមត្រូវ ដូចជាការព្យាករណ៍ពីមុនរបស់ពួកគេ អំពីតម្លៃនៃការព្យាបាលជំងឺរលាកថ្លើមប្រភេទ C ជាដើម។

ប្រធានកម្មវិធីរួមរបស់អង្គការសហប្រជាជាតិស្តីពីមេរោគអេដស៍ និងជំងឺអេដស៍ ឬ UNAIDS លោកស្រី Winnie Byanyima បានជំរុញឲ្យក្រុមហ៊ុន Gilead ធ្វើឲ្យថ្នាំ Lenacapavir អាចរកបានតាមរយៈអង្គការផ្គត់ផ្គង់ប៉ាតង់ឱសថ (MPP) ដែលនឹងអនុញ្ញាតឲ្យមានការលក់ថ្នាំទូទៅ នៅក្នុងប្រទេស ដែលមានចំណូលទាប និងមធ្យម។ ក្រុមហ៊ុន Gilead កំពុងពិភាក្សាអំពីតម្លៃ និងលទ្ធភាពប្រើប្រាស់ ប៉ុន្តែមិនទាន់បានប្រកាសព័ត៌មានលម្អិតជាក់លាក់នៅឡើយទេ៕