ប្រទេសជប៉ុននឹងសហការជាមួយសហរដ្ឋអាមេរិក ដើម្បីធានាសន្តិភាព នៅច្រកសមុទ្រតៃវ៉ាន់ ដោយមិនគិតពីលទ្ធផលនៃការបោះឆ្នោតជ្រើសរើសប្រធានាធិបតីអាមេរិក នាពេលខាងមុខ។ នេះបើយោងទៅតាមប្រធានខុទ្ទកាល័យរបស់ជប៉ុន លោក Yoshimasa Hayashi នៅក្នុងបទសម្ភាសន៍ជាមួយសារព័ត៌មាន Reuters។

ការអត្ថាធិប្បាយបែបនេះ កើតមានឡើងបន្ទាប់ពីលោក Donald Trump បេក្ខជនប្រធានាធិបតីនៃគណបក្សសាធារណរដ្ឋ បាននិយាយថា កោះតៃវ៉ាន់គួរតែបង់ប្រាក់ឲ្យសហរដ្ឋអាមេរិក សម្រាប់ការការពារកោះនេះ ដែលបានបង្កើនការព្រួយបារម្ភ អំពីការគាំទ្ររបស់សហរដ្ឋអាមេរិក ចំពោះកោះតៃវ៉ាន់ ប្រសិនបើលោក Trump ជាប់ឆ្នោតឡើងវិញ។

លោក Hayashi បានសង្កត់ធ្ងន់លើសារៈសំខាន់នៃសន្តិភាព និងស្ថិរភាព នៅច្រកសមុទ្រតៃវ៉ាន់ ដែលជាសន្តិសុខ ទាំងសម្រាប់ប្រទេសជប៉ុន និងសហគមន៍អន្តរជាតិ។ លោកបានអះអាងថា ទាំងសហរដ្ឋអាមេរិក និងជប៉ុន បានប្តេជ្ញាចិត្តក្នុងការដោះស្រាយដោយសន្តិវិធីនៃបញ្ហាឆ្លងច្រកសមុទ្រ ហើយនឹងបន្តកិច្ចខិតខំប្រឹងប្រែងការទូត ដើម្បីពង្រឹងសម្ព័ន្ធភាពរបស់ពួកគេ។

គួរបញ្ចាក់ថា ចិនបានអះអាងថា កោះតៃវ៉ាន់ជាផ្នែកនៃដែនដីរបស់ខ្លួន ហើយមិនបានច្រានចោលការប្រើកម្លាំង ដើម្បីក្រសោបយកកោះនេះនោះទេ។ សហរដ្ឋអាមេរិកតម្រូវឲ្យជួយការពារកោះតៃវ៉ាន់ដោយច្បាប់ ទោះបីមិនមានកិច្ចព្រមព្រៀងការពារជាផ្លូវការណាមួយក៏ដោយ៕