ស្ថានទូតអាមេរិក ប្រចាំនៅទីក្រុងមូស្គូ នាថ្ងៃអង្គារ (ទី២៣ ខែកក្កដា) នេះ បានអំពាវនាវឲ្យរុស្ស៊ីដោះលែងលោកស្រី Alsu Kurmasheva អ្នកសារព័ត៌មានអាមេរិកដើមកំណើតរុស្ស៊ី ដែលធ្វើការឲ្យ RFE/RL ដែលត្រូវកាត់ទោសឲ្យជាប់ពន្ធនាគារ កាលពីសប្តាហ៍មុន។

គួរបញ្ជាក់ថា តុលាការទីក្រុង Kazan បានផ្តន្ទាទោសលោកស្រីពីបទផ្សព្វផ្សាយព័ត៌មានមិនពិត អំពីកងទ័ពរុស្ស៊ី នៅក្នុងការកាត់ក្តីបិទទ្វារ។ លោកស្រី Kurmasheva ដែលមានមូលដ្ឋាននៅទីក្រុង Prague ប្រទេសឆែក ត្រូវបានឃុំឃាំងនៅតំបន់ Tatarstan របស់រុស្ស៊ី ចាប់តាំងពីថ្ងៃទី១៨ ខែតុលាមក។

ដោយត្រូវចាប់ឃុំខ្លួនដំបូង កាលពីខែមិថុនា ក្រោយមក លោកស្រីត្រូវបានចោទប្រកាន់ពីបទបំពានតិចតួច ហើយកាន់តែធ្ងន់ឡើង ពាក់ព័ន្ធនឹងការផ្សព្វផ្សាយព័ត៌មានមិនពិតអំពីយោធា។ ស្វាមីរបស់លោកស្រី គឺលោក Pavel Butorin បាននិយាយថា ការកាត់ក្តីរបស់លោកស្រីត្រូវបានភ្ជាប់ទៅនឹងសៀវភៅដែលលោកស្រីបានកែសម្រួលអំពីជនជាតិរុស្ស៊ីប្រឆាំងនឹងការលុកលុយលើអ៊ុយក្រែន។

ស្ថានទូតសហរដ្ឋអាមេរិក បានពណ៌នាពីលោកស្រី Kurmasheva ថា ជាអ្នកសារព័ត៌មានដែលមានគោលការណ៍ ហើយបានថ្កោលទោសការជាប់ពន្ធនាគាររបស់លោកស្រីថា ជាថ្ងៃដ៏សោកសៅ សម្រាប់វិស័យសារព័ត៌មាន នៅក្នុងប្រទេសរុស្ស៊ី ដោយអំពាវនាវឲ្យមានការដោះលែងអ្នកសារព័ត៌មានទាំងអស់ដែលកំពុងជាប់ឃុំ និងអ្នកទោសមនសិការ។

វិមានក្រឹមឡាំងបានបដិសេធកាលពីមុនថា មិនបានកំណត់គោលដៅពលរដ្ឋអាមេរិកនោះឡើយ ហើយបាននិយាយថា ខ្លួនមិនបានតាមដានករណីរបស់អ្នកសារព័ត៌មានរូបនេះទេ។ ទោះបីមិនទាន់មានការឆ្លើយតបកន្លងមកពីអាជ្ញាធររុស្ស៊ីក៏ដោយ ក៏ស្ថានទូតអាមេរិកនៅតែបន្តស្នើសុំឲ្យកុងស៊ុលបានចូលទៅជួបលោកស្រី Kurmasheva៕