ប្រភពការទូតទួរគី បាននិយាយថា ការរាយការណ៍របស់សារព័ត៌មាន ដែលថា ប្រធានាធិបតីទួរគី លោក Tayyip Erdogan នឹងជួបជាមួយប្រធានាធិបតីស៊ីរី លោក Bashar al-Assad គឺមិនពិតនោះទេ។

ដោយដកស្រង់ប្រភពដែលនិយាយក្នុងលក្ខខណ្ឌមិនបញ្ចេញឈ្មោះ សារព័ត៌មាន Daily Sabah របស់ទួរគី បានរាយការណ៍ថា កិច្ចប្រជុំបែបនេះ អាចប្រព្រឹត្តទៅនៅខែសីហា ក្នុងទីក្រុងមូស្គូ ដែលមានប្រធានាធិបតីរុស្ស៊ី លោក Vladimir Putin ជាអ្នកសម្រុះសម្រួល។

តែបន្ទាប់ពីមាននូវរបាយការណ៍នោះ ប្រភពការទូតដែលនិយាយទៅកាន់ក្រុមអ្នកសារព័ត៌មាន កាលពីថ្ងៃចន្ទ (ទី២២ ខែកក្កដា) បានប្រាប់ឲ្យដឹងថា មិនមានផែនការបែបនេះនោះទេ។

គួរបញ្ជាក់ថា ប្រទេសទួរគី គឺជាអ្នកគាំទ្រដ៏សំខាន់មួយ ចំពោះគូប្រជែងរបស់លោក Assad ក្នុងសង្គ្រាមស៊ីវិលស៊ីរី ដែលបានចាប់ផ្តើមក្នុងឆ្នាំ២០១១ ខណៈដែលប្រទេសរុស្ស៊ី គឺជាសម្ព័ន្ធមិត្តសមរភូមិដ៏សំខាន់មួយរបស់លោក Assad ដោយបានជួយលោកឲ្យគ្រប់គ្រងឡើងវិញលើផ្នែកដោយភាគច្រើនរបស់ប្រទេសស៊ីរី។

រដ្ឋាភិបាលរបស់លោក Assad បានស្តារទំនាក់ទំនងការទូតជាមួយរដ្ឋអារ៉ាប់មួយចំនួន ដែលត្រូវបានកាត់ផ្តាច់ អំឡុងសង្គ្រាម ប៉ុន្តែទីក្រុងដាម៉ាស នៅតែមានជម្លោះជាមួយទីក្រុងអង់ការ៉ា ដែលនៅតែការពារក្រុមឧទ្ទាមប្រឆាំងលោក Assad មួយចំនួន នៅភាគពាយ័ព្យនៃប្រទេសស៊ីរី៕