អាហ្វហ្គានីស្ថាន៖ ការអបអរសាទរយ៉ាងកងរំពងបានកើតឡើង នៅផ្នែកខ្លះនៃទីក្រុងកាន់ដាហាប្រទេសអាហ្វហ្គានីស្ថានកាលពីថ្ងៃអង្គារ បន្ទាប់ពីក្រុមតាលីបង់បានកាន់កាប់ប្រទេសនេះ និងរដ្ឋធានីកាប៊ុលទាំងស្រុង។ វីដេអូបានបង្ហាញពីការប្រមូលផ្តុំគ្នានៅទីក្រុងកាន់ដាហា ដោយមានការអុជកាំជ្រួច និងសំឡេងស៊ីផ្លេរថយន្តបានបន្លឺឡើង ជាអ្វីដែលគេគិតថាជាពិធីគាំទ្រក្រុមតាលីបង់។
សមាជិកដ៏លេចធ្លោម្នាក់នៃការិយាល័យនយោបាយរបស់តាលីបង់ បានអបអរសាទរជនជាតិអាហ្វហ្គានីស្ថានចំពោះ “ជ័យជំនះដ៏អស្ចារ្យ” របស់ពួកគេក្នុងការសម្រេចបាននូវ “ឯករាជ្យភាពពេញលេញរបស់ប្រទេស” នៅពេលដែលកងទ័ពអាមេរិកដកចេញ។ ក្រុមតាលីបង់បានគ្រប់គ្រងយ៉ាងពេញលេញ លើអាកាសយានដ្ឋានអន្តរជាតិទីក្រុងកាប៊ុលកាលពីថ្ងៃអង្គារ មួយថ្ងៃបន្ទាប់ពីសហរដ្ឋអាមេរិកបានបញ្ចប់ការដកកងទ័ពរបស់ខ្លួនចេញពីអាហ្វហ្គានីស្ថាន និងបញ្ចប់សង្គ្រាមយូរបំផុតមិនធ្លាប់មាន។ គេបានឃើញរថយន្ត និងកងកម្លាំងរបស់ក្រុមសកម្មប្រយុទ្ធច្រូងច្រាង នៅខាងក្នុងបរិវេណអាកាសយានដ្ឋាន។
កាលពីយប់ថ្ងៃចន្ទ សហរដ្ឋអាមេរិកបានអនុវត្តការហោះហើរចុងក្រោយរបស់ខ្លួន នៅក្នុងប្រទេសអាហ្វហ្គានីស្ថាន ២សប្ដាហ៍បន្ទាប់ពីបានចាប់ផ្ដើមប្រតិបត្តិការជម្លៀសប្រជាជនអាហ្វហ្គានីស្ថាន ជនជាតិអាមេរិករាប់ម៉ឺននាក់ និងអ្នកផ្សេងទៀតដែលចង់ចាកចេញពីប្រទេសនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
