មន្ត្រីក្នុងតំបន់បាននិយាយកាលពីថ្ងៃអង្គារ (២៣ កក្កដា) ថា មនុស្សយ៉ាងហោចណាស់ ៦០០នាក់ត្រូវបានសម្លាប់ចាប់តាំងពីថ្ងៃទី១០ ខែឧសភា មក នៅក្នុងការប៉ះទង្គិចគ្នាដែលកំពុងបន្តរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នៅទីក្រុង អ៊ែលហ្វាសឺ (El Fasher) រដ្ឋធានីនៃរដ្ឋ ណសដាហ្វឺ (North Darfur) ក្នុងប្រទេសស៊ូដង់។

លោក អ៊ីប្រាហ៊ីម ខាទឺ (Ibrahim Khatir) អគ្គនាយកនៃក្រសួងសុខាភិបាលនៃរដ្ឋ North Darfur បានប្រាប់សារព័ត៌មានស៊ីនហួរ (Xinhua) ថា «យោងតាមកំណត់ត្រាផ្លូវការ មនុស្សយ៉ាងហោចណាស់ ៦០០នាក់ត្រូវបានសម្លាប់ និងប្រហែល ៤.៥០០នាក់បានរងរបួស»។

លោកបញ្ជាក់ថាចំនួនអ្នកស្លាប់អាចនឹងមានច្រើនជាងនេះទៀតព្រោះថា «ជនរងគ្រោះខ្លះត្រូវបានគ្រួសារគេបញ្ចុះដោយផ្ទាល់ដោយមិនបានទៅមន្ទីរពេទ្យ»។

ស៊ូដង់បានជាប់គាំងនៅក្នុងជម្លោះដ៏បង្ហូរឈាមរវាងកងទ័ព SAF និងកងកម្លាំង RSF ចាប់តាំងពីខែមេសា ឆ្នាំ២០២៣ ដែលបណ្តាលឱ្យមនុស្សយ៉ាងហោចណាស់ ១៦.៦៥០នាក់បាត់បង់ជីវិត នេះបើយោងតាមការធ្វើបច្ចុប្បន្នភាពដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌នៅក្នុងខែមិថុនា។

ទិន្នន័យដែលបានចេញផ្សាយដោយទីភ្នាក់ងារទេសន្តរប្រវេសន៍អន្តរជាតិ (IOM) របស់អង្គការសហប្រជាជាតិក្នុងខែមិថុនា បានបង្ហាញថាមនុស្សជាង ៧,៧លាននាក់ត្រូវបានភៀសខ្លួននៅខាងក្នុងប្រទេសស៊ូដង់ ចាប់តាំងពីជម្លោះបានចាប់ផ្តើម ដោយមានប្រហែល ២,២លាននាក់ផ្សេងទៀតកំពុងស្វែងរកការជ្រកកោននៅក្នុងប្រទេសជិតខាង៕