​បាល់ទាត់៖ ​ខ្សែប្រយុទ្ធ​បារាំង Antoine Griezmann បាន​ចាក​ចេញពី Barcelona វិល​ត្រលប់​ទៅ​ចូលរួម​ជាមួយ​ក្លិប​ចាស់​របស់ខ្លួន Atletico Madrid វិញ​ជាមួយនឹង​កិច្ចសន្យាខ្ចី​ជើង​រយៈពេល ២រដូវ​កាល​។ ​​Atletico Madrid នឹង​រ៉ាប់រង​រាល់​ការ​ចំណាយ​លើ​ប្រាក់​ឈ្នួល​របស់​កីឡាករ​វ័យ ៣០​ឆ្នាំ​រូប​នេះ​រួម​ជាមួយ​នឹង​លក្ខខណ្ឌ​ទិញ​ផ្តាច់​ផង​ដែរ​។​

​​កីឡាករ​ជំរើសជាតិ​បារាំង​រូបនេះ​ធ្លាប់បាន​ស៊ុត​បញ្ចូល​ទី ១៣៣គ្រាប់​ក្នុងការ​បង្ហាញខ្លួន ២៥៧ប្រកួត​នៅ Atletico Madrid មុនពេល​ចាកចេញ​ទៅ Barcelona កាលពី​ឆ្នាំ២០១៩ ក្នុងតម្លៃ ១០៧លាន​ផោន​។ ​តែ​នៅ Barcelona, Griezmann រក​បាន​ត្រឹម ៣៥​គ្រាប់​ប៉ុណ្ណោះ​ក្នុងការ​បង្ហាញខ្លួន ១០២ប្រកួត​។ ​Griezmann គឺជា​កីឡា​ករទី ១១ របស់ Barcelona ដែល​បាន​ចាកចេញ​ ដើម្បី​បន្ធូរបន្ថយ​វិបត្តិ​ហិរញ្ញវត្ថុ​របស់​ក្លិប​ក្នុង​រដូវក្តៅ​នេះ​។ ​Griezmann ក៏​ជា​កីឡា​ករទី៣ ដែរ​ដែល​ចាកចេញ​ក្នុង​ថ្ងៃ​ដោះដូរ​កីឡាករ​ចុងក្រោយ​ បន្ទាប់ពីខ្សែការពារ​ស្តាំ Emerson Royal ផ្លាស់​ទៅកាន់ Tottenham Hotspur តម្លៃ ២៥.៨លាន​ផោន និង​ខ្សែបម្រើ​វ័យក្មេង Ilaix Moriba ចាក​ចេញទៅ RB Leipzig តម្លៃ ១៣.៧លាន​ផោន​។

​​ជាមួយនឹង​ការមកដល់​របស់ Griezmann, Atletico Madrid ក៏បាន​បញ្ចេញ​ខ្សែបម្រើ Saul Niguez ទៅកាន់​តោ​ខៀវ Chelsea ក្នុង​កិច្ចសន្យាខ្ចី​។ ​កីឡាករ​វ័យ ២៦ឆ្នាំ​រូបនេះ​គឺជា​កីឡាករ​នាំ​លេង​ម្នាក់​របស់ Atletico Madrid ដែល​ឈ្នះ​ជើងឯក La Liga រដូវ​កាល​មុន​ដោយបាន​បង្ហាញខ្លួន​សរុប​នៅ La Liga ៣៣លើក​។ ​ការមកដល់​របស់ Saul Niguez បន្ទាប់ពី Chelsea បរាជ័យ​ក្នុងការ​នាំយក​ខ្សែការពារ Jules Kounde ពី Sevilla បន្ទាប់ពី Sevilla ទាមទារ​សំណើ​មិន​ក្រោម ៨០លាន​អឺរ៉ូ​ឡើយ​សំរាប់​កីឡាករ​វ័យ ២២ឆ្នាំ​រូបនេះ​៕

​អត្ថបទ​៖​នាង សុភា​វុ​ធ