ប្រធានាធិបតីម៉ិកស៊ិក លោក Andres Manuel Lopez Obrador បាននិយាយកាលពីថ្ងៃអង្គារថា បញ្ហាចម្បងដែលសហរដ្ឋអាមេរិកកំពុងប្រឈមមុខគឺការធ្លាក់ចុះផ្នែកសង្គម ដែលនាំទៅរកការរីករាលដាលនៃគ្រឿងញៀន ក្នុងចំណោមយុវជនរបស់ប្រទេសនេះ។

នៅក្នុងសន្និសីទសារព័ត៌មានប្រចាំថ្ងៃរបស់លោក ប្រធានាធិបតីម៉ិកស៊ិក បានជំរុញឱ្យរដ្ឋាភិបាលសហរដ្ឋអាមេរិក ធ្វើឲ្យប្រសើរគោលនយោបាយទាក់ទងទៅនឹងយុវជន និងដោះស្រាយមូលហេតុ ដែលនាំទៅរកវិបត្តិគ្រឿងញៀន និងការប្រើប្រាស់គ្រឿងញៀនដូចជាសារធាតុហ្វង់តានីលជាដើម។

លោក Lopez Obrador បាននិយាយទៅកាន់អ្នកសារព័ត៌មាននៅវិមានជាតិក្នុងទីក្រុង Mexico City ថា វិបត្តិគ្រឿងញៀននៅសហរដ្ឋអាមេរិក បានផ្សារភ្ជាប់ទៅនឹង «ការបាត់បង់តម្លៃ»។

លោក Lopez Obrador បាននិយាយថា លោកគិតថាពួកគេចាប់ផ្តើមបំភ្លេចអំពីរឿងនោះ ហើយបុគ្គលនិយម សម្ភារៈនិយម និងការប្រើប្រាស់និយម បានចាប់ផ្តើមគ្របដណ្ដប់ នោះគឺជាផ្នែកនៃវិបត្តិ ហើយ វាពុំមែនជាបញ្ហាងាយស្រួលក្នុងការដោះស្រាយនោះទេ វាត្រូវតែបានដោះស្រាយពីមូលហេតុ។

លោកនិយាយថា មិនដូចសហរដ្ឋអាមេរិកនោះទេ ប្រទេសម៉ិកស៊ិក រក្សាប្រពៃណី និងតម្លៃគ្រួសារ ដែលពង្រឹងដល់សង្គម។ ជាថ្មីម្តងទៀត លោក Lopez Obrador បានអំពាវនាវឱ្យរដ្ឋាភិបាលសហរដ្ឋអាមេរិក បញ្ឈប់ការដាក់កំហុសលើជនអន្តោប្រវេសន៍ម៉ិកស៊ិក សម្រាប់បញ្ហាគ្រឿងញៀនរបស់ខ្លួន។