ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានច្រានចោលការអះអាងរបស់អតីតប្រធានាធិបតីអាមេរិក លោក Donald Trump អំពីការមានទំនាក់ទំនងល្អជាមួយមេដឹកនាំ លោក គីម ជុងអ៊ុន (Kim Jong Un) ដោយនិយាយថា «យើងមិនចាប់អារម្មណ៍នោះឡើយ» និងសង្កត់ធ្ងន់ថា ឃ្លាំងអាវុធនុយក្លេអ៊ែររបស់ខ្លួន គឺត្រៀមរួចជាស្រេច សម្រាប់មេដឹកនាំអាមេរិកណាក៏បាន។

ទីភ្នាក់ងារសារព័ត៌មានមជ្ឈិមកូរ៉េ (KCNA) នៅថ្ងៃពុធ (ទី២៤ ខែកក្កដា) នេះ បានអត្ថាធិប្បាយថា ទោះបីជាការខិតខំប្រឹងប្រែងរបស់លោក Trump ក្នុងការលើកដម្កើងពីទំនាក់ទំនងផ្ទាល់ខ្លួនក៏ដោយ ក៏ទីក្រុងព្យុងយ៉ាងនៅតែចាត់ទុកគោលនយោបាយរបស់សហរដ្ឋអាមេរិក ជាអរិភាពដដែល ហើយអតីតប្រធានាធិបតីរូបនេះ មិនសម្រេចបាននូវការផ្លាស់ប្តូរជាវិជ្ជមានដុំកំភួននោះឡើយ។

គួរបញ្ជាក់ថា នេះគឺជាការឆ្លើយតបដំបូងរបស់កូរ៉េខាងជើង ចាប់តាំងពីលោក Trump បានសរសើរពីទំនាក់ទំនងរបស់លោកជាមួយលោក គីម នៅក្នុងសន្និបាតគណបក្សសាធារណរដ្ឋ ជាកន្លែងដែលលោកបានលើកឡើងថា លោកមេដឹកនាំកូរ៉េខាងជើងទំនងជាចង់ឲ្យលោកត្រឡប់ទៅអង្គុយកៅអីសេតវិមានវិញ។ តែយ៉ាងណាក្ដី សារព័ត៌មាន KCNA បានអះអាងថា ទំនាក់ទំនងផ្ទាល់ខ្លួន និងការទូត គឺជារឿង ២ ដាច់ដោយឡែកពីគ្នា ដោយកត់សម្គាល់ថា បរិយាកាសនយោបាយរបស់សហរដ្ឋអាមេរិក នៅតែមិនប្រែប្រួល ដោយមិនពាក់ព័ន្ធនឹងការដូរផ្លាស់រដ្ឋបាលឡើយ។

នៅឆ្នាំ២០១៧ លោក Trump បានគំរាមកំហែងបញ្ចេញ «ភ្លើងកំហឹង» ចំពោះការសាកល្បងនុយក្លេអ៊ែររបស់កូរ៉េខាងជើង ខណៈដែលសារព័ត៌មាន KCNA បានប្រមាថលោកថា ជា «មនុស្សចាស់វង្វេងវង្វាន់»។ តែបន្ទាប់ពីជំនួបជាប្រវត្តិសាស្ត្រ នៅឆ្នាំ២០១៨ នៅប្រទេសសិង្ហបុរី ពួកគេបានបន្ទន់ឥរិយាបថ ដោយមន្ត្រីកូរ៉េខាងជើងលើកឡើងអំពីការយល់ចិត្តគ្នា «ដ៏អស្ចារ្យ» រវាងមេដឹកនាំទាំង២។ ពួកគេបានយល់ព្រមលើការប្រកាសរំសាយអាវុធនុយក្លេអ៊ែរជាមូលដ្ឋាន ប៉ុន្តែលោក គីម មិនបានចាត់វិធានការពិតប្រាកដណាមួយ ដើម្បីកាត់បន្ថយឃ្លាំងអាវុធរបស់ខ្លួននោះទេ ជំនួសមកវិញដោយការបន្តសាកល្បងមីស៊ីល បន្ទាប់ពីការចរចារបានជាប់គាំង ក្នុងឆ្នាំ២០១៩ នៅប្រទេសវៀតណាម៕