រដ្ឋមន្ត្រីក្រសួងពាណិជ្ជកម្ម លោក Wang Wentao កាលពីថ្ងៃអង្គារ (ទី២៣ ខែកក្កដា) បាននិយាយថា ប្រទេសចិនស្វាគមន៍ក្រុមហ៊ុនអាមេរិក ក្នុងការស្វែងរកទីផ្សាររបស់ខ្លួនបន្ថែមទៀត ប៉ុន្តែបានប្រាប់ថា ការរឹតបន្តឹងការវិនិយោគរបស់រដ្ឋាភិបាលសហរដ្ឋអាមេរិកដែលផ្តោតលើប្រទេសចិន នឹងប៉ះពាល់យ៉ាងធ្ងន់ធ្ងរដល់ការវិនិយោគ និងប្រតិបត្តិការរបស់ក្រុមហ៊ុនអាមេរិក នៅក្នុងប្រទេសចិន។

លោក Wang បានធ្វើសេចក្តីថ្លែងការណ៍នៅពេលជួបជាមួយគណៈប្រតិភូដែលដឹកនាំដោយ លោក Raj Subramaniam ប្រធានក្រុមប្រឹក្សាធុរកិច្ចអាមេរិក-ចិន (USCBC) នៅទីក្រុងប៉េកាំង។

លោក Wang បាននិយាយថា សម័យប្រជុំពេញអង្គលើកទី៣ នៃគណៈកម្មាធិការមជ្ឈិមបក្សកុម្មុយនីស្តចិន (CPC) បានធ្វើការរៀបចំប្រព័ន្ធ ស្ដីពីការកែទម្រង់កាន់តែស៊ីជម្រៅបន្ថែមទៀត ដើម្បីជំរុញទំនើបភាវូបនីយកម្មរបស់ចិន ដោយកត់សម្គាល់ថា សេដ្ឋកិច្ចទីផ្សារសង្គមនិយមស្តង់ដារខ្ពស់ គឺជាការធានាដ៏សំខាន់មួយ សម្រាប់ទំនើបកម្មរបស់ចិន។

គួរបញ្ជាក់ថា ប្រទេសចិនបានប្តេជ្ញាចិត្ត ចំពោះគោលនយោបាយជាតិជាមូលដ្ឋានរបស់ខ្លួន ក្នុងការបើកចំហទៅកាន់ពិភពខាងក្រៅ នឹងអភិវឌ្ឍប្រព័ន្ធថ្មី សម្រាប់សេដ្ឋកិច្ចបើកចំហដែលមានស្តង់ដារខ្ពស់ កាត់បន្ថយបញ្ជីអវិជ្ជមាន សម្រាប់ការវិនិយោគបរទេស និងលើកកម្ពស់បរិយាកាសអាជីវកម្ម។ 

លោករដ្ឋមន្ត្រីក្រសួងពាណិជ្ជកម្ម បានប្រាប់បន្ថែមថា ប្រទេសរបស់លោកស្វាគមន៍ក្រុមហ៊ុនអាមេរិក និងអ្នកមកពីប្រទេសផ្សេងៗ ដើម្បីស្វែងរកទីផ្សារចិនបន្ថែមទៀត និងចែករំលែកឱកាសអភិវឌ្ឍន៍៕