រដ្ឋាភិបាលយេម៉ែន កាលពីថ្ងៃអង្គារ បានស្វាគមន៍កិច្ចព្រមព្រៀងដែលសម្របសម្រួលដោយអង្គការសហប្រជាជាតិ ដើម្បីបញ្ចប់ជម្លោះផ្នែកធនាគារជាមួយកងជីវពលហ៊ួទី និងចាប់ផ្តើមជើងហោះហើរឡើងវិញពីរដ្ឋធានី Sanaa ដែលគ្រប់គ្រងដោយក្រុមហ៊ួទី។

យោងតាមសេចក្តីថ្លែងការណ៍ដែលចេញផ្សាយដោយទីភ្នាក់ងារសារព័ត៌មានរដ្ឋ Saba ពួកគេ កំពុងស្ថិតក្នុងចំណោមវិធានការសំខាន់ៗដែលមានចែងក្នុងកិច្ចព្រមព្រៀង ដែលមានគោលបំណងបន្ធូរបន្ថយវិបត្តិមនុស្សធម៌របស់ប្រទេសដែលញាំញីដោយសង្រ្គាមនះ។

សេចក្តីថ្លែងការណ៍នោះ បានបញ្ជាក់ថា ក្នុងគោលបំណង ដើម្បីកាត់បន្ថយការលំបាករបស់ប្រជាពលរដ្ឋ ជាពិសេសអ្នកនៅក្នុងតំបន់ដែលស្ថិតនៅក្រោមការគ្រប់គ្រងរបស់កងកម្លាំងហ៊ួទី និងពិចារណាលើការអំពាវនាវពីសហគមន៍ធុរកិច្ចយេម៉ែន និងអ្នកសម្រុះសម្រួលអន្តរជាតិ រដ្ឋាភិបាល បានសម្រេចចិត្តយល់ព្រមលើកិច្ចព្រមព្រៀងនេះ។

រដ្ឋាភិបាលយេម៉ែន បានសម្តែងសុទិដ្ឋិនិយមថា គំនិតផ្តួចផ្តើមនេះ នឹងជំរុញលក្ខខណ្ឌអំណោយផលសម្រាប់កិច្ចសន្ទនាក្នុងន័យស្ថាបនា។

នៅព្រឹកថ្ងៃដដែល បេសកជនពិសេសរបស់អង្គការសហប្រជាជាតិទទួលបន្ទុកកិច្ចការប្រទេសយេម៉ែន លោក Hans Grundberg បានប្រកាសថា ដោយសារមានកិច្ចខិតខំប្រឹងប្រែងសម្របសម្រួលរបស់អារ៉ាប៊ីសាអ៊ូឌីតនេះហើយ ទើបរដ្ឋាភិបាលយេម៉ែន និងក្រុមហ៊ួទី បានយល់ព្រមដោះស្រាយជម្លោះផ្នែកធនាគារដែលមានរយៈពេលយូររបស់ពួកគេ និងបន្តជើងហោះហើរពីទីក្រុងSanaaឡើងវិញ។