សមាជិកគណៈរដ្ឋមន្ត្រីស្តាំជ្រុលនិយមរបស់ប្រទេសអ៊ីស្រាអែល លោក Itamar Ben Gvir បានគាំទ្រឲ្យលោក Donald Trump ក្លាយជាប្រធានាធិបតីអាមេរិក ដោយជឿថា ការវិលត្រឡប់ទៅអង្គុយកៅអីសេតវិមានវិញរបស់អតីតមេដឹកនាំរូបនេះ នឹងជំរុញដល់ការប្រយុទ្ធរបស់អ៊ីស្រាអែលប្រឆាំងនឹងអ៊ីរ៉ង់ និងសម្ព័ន្ធមិត្តរបស់ប្រទេសនេះ។

លោក Ben Gvir ប្រធានគណបក្សជាតិនិយម គឺគណបក្សអំណាចជនជាតិជ្វីហ្វ ដែលមានសារៈសំខាន់ចំពោះរដ្ឋាភិបាលចម្រុះរបស់លោក Benjamin Netanyahu បានរិះគន់កិច្ចចរចាបទឈប់បាញ់ នៅតំបន់ហ្កាហ្សា ដែលលោកជឿថា អាចបំផ្លាញកិច្ចប្រឹងប្រែង ដើម្បីឲ្យចំណាប់ថ្នូរអ៊ីស្រាអែលត្រូវបានដោះលែង។ ជាមួយគ្នានេះ លោកក៏បានគំរាមដើរចេញពីរដ្ឋាភិបាលផងដែរ ជុំវិញបទឈប់បាញ់ដែលមិនផ្ដល់ប្រយោជន៍។

ការអត្ថាធិប្បាយរបស់លោក Ben Gvir កើតមានឡើងមុនមានសុន្ទរកថារបស់លោក Netanyahu ទៅកាន់សភាសហរដ្ឋអាមេរិក និងកិច្ចប្រជុំជាមួយមេដឹកនាំសហរដ្ឋអាមេរិក។ ខណៈពេលដែលលោក Netanyahu នៅតែមានអព្យាក្រឹតភាព លោក Ben Gvir បានរិះគន់ប្រធានាធិបតីបច្ចុប្បន្ន លោក Joe Biden ចំពោះការមិនមានការគាំទ្រគ្រប់គ្រាន់ប្រឆាំងនឹងក្រុមហាម៉ាស ដោយនិយាយថា «ជាមួយលោក Trump វានឹងកាន់តែច្បាស់ថា សត្រូវត្រូវតែរងបរាជ័យ»។

ជាមួយគ្នានេះ លោក Ben Gvir ក៏បានរិះគន់ការឆ្លើយតបយ៉ាងស្រាលរបស់អ៊ីស្រាអែល ចំពោះការវាយប្រហារដោយមីស៊ីល និងយានដ្រូនរបស់អ៊ីរ៉ង់ ដែលលោកបានហៅថា មាន «ភាពកម្សោយ»។ ហើយលោកបានសរសើរពីគោលនយោបាយមិនចុះញ៉មរបស់លោក Trump ប្រឆាំងនឹងអ៊ីរ៉ង់ ហើយបានលើកឡើងពីឥរិយាបថរបស់អ៊ីស្រាអែលចំពោះសហរដ្ឋអាមេរិក ត្រូវកែប្រែ ជាការផ្លាស់ប្តូរដែលលោកជឿថា នឹងកើតឡើងតែជាមួយលោក Trump ប៉ុណ្ណោះ។

លោក Ben Gvir បានព្រមានថា លោកនឹងលាលែងពីរដ្ឋាភិបាលរបស់លោក Netanyahu ប្រសិនបើបទឈប់បាញ់ត្រូវបានកើតឡើងដោយលោកមិនគាំទ្រ ដោយពេញចិត្តការបង្កើនសម្ពាធលើក្រុមហាម៉ាស និងការមានសង្រ្គាមពេញលេញដែលអាចកើតមានជាមួយក្រុមហេសបូឡាហ៍ ដោយនិយាយថា «កាន់តែឆាប់កាន់តែល្អ» ទោះបីជាមានភាពចម្រូងចម្រាសក៏ដោយ ក៏លោកបានអះអាងពីការកើនឡើងនូវការគាំទ្រ ក្នុងប្រទេសអ៊ីស្រាអែល ដោយនិយាយថា៖ «ជនជាតិអ៊ីស្រាអែលភាគច្រើន បានទទួលស្គាល់ថា ការយល់ឃើញរបស់ខ្ញុំ គឺពិតជាត្រឹមត្រូវ»៕