ប្រទេសឥណ្ឌា បានកាត់បន្ថយពន្ធនាំចូលមាស និងប្រាក់កាលពីថ្ងៃអង្គារ ដែលជាចំណាត់ការមួយ មន្ត្រីឧស្សាហកម្ម បាននិយាយថា អាចលើកតម្រូវការលក់រាយ និងជួយកាត់បន្ថយការរត់ពន្ធ នៅក្នុងប្រទេស ប្រើប្រាស់មាសច្រើនបំផុតទី២របស់ពិភពលោក។

តម្រូវការមាសកាន់តែខ្ពស់ពីប្រទេសឥណ្ឌា អាចជំរុញតម្លៃពិភពលោកដែលឡើងដល់កម្រិតខ្ពស់ នៅឆ្នាំនេះ បើទោះបីជា តម្រូវការនោះ អាចពង្រីកឱនភាពពាណិជ្ជកម្មរបស់ឥណ្ឌា និងដាក់សម្ពាធលើប្រាក់រូពីដែលកំពុងធ្លាក់តម្លៃក៏ដោយ។

លោក Sachin Jain នាយកប្រតិបត្តិនៃប្រតិបត្តិការឥណ្ឌារបស់ក្រុមប្រឹក្សាមាសពិភពលោក បាននិយាយថា៖«នេះ គឺជាជំហានដ៏ធំមួយ នៅក្នុងទិសដៅត្រឹមត្រូវ ព្រោះវានឹងកាត់បន្ថយការលើកទឹកចិត្តសម្រាប់ការរត់ពន្ធមាស។ វានឹងបង្កើតឱកាសស្មើភាពនិងត្រឹមត្រូវសម្រាប់អ្នកវិនិយោគក្នុងឧស្សាហកម្មនេះ។ 

រដ្ឋាភិបាលឥណ្ឌា បាននិយាយថា ខ្លួននឹងគិតពន្ធគយមូលដ្ឋាន ៥ភាគរយ និង ១ភាគរយ ក្នុងវិស័យហេដ្ឋារចនាសម្ព័ន្ធ និងអភិវឌ្ឍន៍កសិកម្ម (AIDC) ហើយសម្រាប់ការនាំចូលមាស និងប្រាក់ គឺកាត់បន្ថយពន្ធនាំចូលពី១៥ភាគរយ មកត្រឹម ៦ភាគរយ។