រដ្ឋមន្ត្រីការបរទេសសមាគមប្រជាជាតិអាស៊ីអាគ្នេយ៍ ឬអាស៊ាន បានជួបជុំប្រជុំគ្នា នៅក្នុងប្រទេសឡាវ នាថ្ងៃពុធ (ទី២៤ ខែកក្កដា) ដើម្បីស្វែងរកដំណោះស្រាយ ចំពោះវិបត្តិមីយ៉ាន់ម៉ាដែលកំពុងបន្តមាន និងភាពតានតឹង នៅសមុទ្រចិនខាងត្បូង។ កិច្ចប្រជុំនេះត្រូវបានធ្វើឡើង នៅមុនកិច្ចប្រជុំកំពូលពិភពលោកសំខាន់ៗ នាថ្ងៃទី២៧ ខែកក្កដា ដែលនឹងចូលរួមដោយមន្ត្រីការទូតជាន់ខ្ពស់មកពីសហរដ្ឋអាមេរិក សហភាពអឺរ៉ុប ជប៉ុន ចិន រុស្ស៊ី និងប្រទេសផ្សេងជាច្រើនទៀត។

រដ្ឋមន្ត្រីទាំងអស់ នឹងពិភាក្សាអំពីកិច្ចខិតខំប្រឹងប្រែងដែលជាប់គាំង ក្នុងការដោះស្រាយសង្គ្រាមស៊ីវិល នៅសហភាពមីយ៉ាន់ម៉ា ដែលបានធ្វើឲ្យប្រជាជនចំនួន ២,៦លាននាក់ត្រូវភៀសខ្លួន។ ប្រទេសសមាជិកធំៗរបស់អាស៊ាន ក្នុងនោះរួមទាំងថៃ និងឥណ្ឌូនេស៊ីផងដែរ មានការខកចិត្ត ចំពោះការខ្វះការប្តេជ្ញាចិត្តរបស់របបយោធាមីយ៉ាន់ម៉ា ក្នុងការសន្ទនា។

ប្រទេសឡាវ ក្នុងនាមជាប្រធានអាស៊ានបច្ចុប្បន្ន កំពុងធ្វើការ ជុំវិញកិច្ចខិតខំប្រឹងប្រែងសន្តិភាព ទោះបីជាការរីកចម្រើនមានភាពយឺតយ៉ាវក៏ដោយ។ ចំណែករដ្ឋមន្ត្រីឥណ្ឌូនេស៊ី លោក Sidharto Suryodipuro បានកត់សម្គាល់ថា៖ «កិច្ចខិតខំប្រឹងប្រែងការទូត មិនអាចបញ្ចប់ទៅបាន ក្នុងរយៈពេលតែមួយយប់នោះទេ»។

ដោយឡែកបញ្ហានៅសមុទ្រចិនខាងត្បូង អាស៊ានមានបំណងបញ្ចប់ក្រមប្រតិបត្តិដែលបានពិភាក្សាជាយូរមកហើយជាមួយប្រទេសចិន។ ភាពតានតឹង នៅក្នុងដែនទឹកនេះ បានកើនឡើង ដោយសារតែការប្រឈមមុខដាក់គ្នា រវាងទីក្រុងប៉េកាំង និងហ្វីលីពីនដែលគាំទ្រដោយសហរដ្ឋអាមេរិក។ ហ្វីលីពីននឹងស្នើឲ្យមានវេទិកាឆ្មាំល្បាតឆ្នេរអាស៊ាន ដើម្បីលើកកម្ពស់ការសន្ទនា និងការអនុវត្តច្បាប់ ជាផែនការមួយដែលទំនងធ្វើឲ្យចិនមិនពេញចិត្ត៕