ក្រសួងយុត្តិធម៌ បាននិយាយថា ក្រុមហ៊ុន Boeing បានយល់ព្រមផ្តល់ចម្លើយពីភាពមានទោស ចំពោះការចោទប្រកាន់ពីបទសមគំនិតក្លែងបន្លំបទព្រហ្មទណ្ឌ និងបង់ប្រាក់ពិន័យចំនួន២៤៣,៦លានដុល្លារ បន្ទាប់ពីក្រុមហ៊ុនផលិតយន្តហោះមួយនេះ បានបំពានកិច្ចព្រមព្រៀងកាត់ទោសដែលបានពន្យាពេលកាលពីឆ្នាំ២០២១ នេះបើយោងតាមឯកសាររបស់តុលាការ កាលពីថ្ងៃពុធ។

ក្រុមហ៊ុន Boeing កាលពីថ្ងៃទី ៧ ខែកក្កដា បានព្រមព្រៀងជាគោលការណ៍ក្នុងការផ្តល់ចម្លើយពីភាពមានទោស ចំពោះការឃុបឃិតបន្លំរដ្ឋបាលអាកាសចរណ៍សហព័ន្ធ បន្ទាប់ពីរដ្ឋាភិបាល បាននិយាយថា ក្រុមហ៊ុនផលិតយន្តហោះមួយនេះ បានធ្វើការបង្ហាញមិនពិត អំពីកម្មវិធី software សំខាន់ៗសម្រាប់ យន្តហោះ 737 MAX ។

ក្រុមគ្រួសារជនរងគ្រោះ ៣៤៦នាក់ ដែលបានស្លាប់នៅក្នុងឧបទ្ទវហេតុធ្លាក់យន្តហោះ Boeing 737 MAX ចំនួនពីរគ្រឿងកាលពីឆ្នាំ២០១៨និងឆ្នាំ២០១៩ នឹងអាចប្តឹងជំទាស់ នៅមុនពេលចៅក្រម លោក Reed O'Connor ត្រូវសម្រេចថាតើ ត្រូវទទួលយកកិច្ចព្រមព្រៀងនេះ និងដើម្បីកំណត់ថាតើក្រុមហ៊ុន Boeing ផ្តល់សំណងដល់ក្រុមគ្រួសារអ្នកស្លាប់ ដោយរបៀបណា។

ក្រុមហ៊ុន Boeing បាននិយាយថា យើងនឹងបន្តធ្វើការប្រកបដោយតម្លាភាពជាមួយនិយតកររបស់យើង ខណៈយើងមានវិធានការសំខាន់ៗសម្រាប់ក្រុមហ៊ុន Boeing ដើម្បីពង្រឹងបន្ថែមទៀតនូវកម្មវិធីសុវត្ថិភាព គុណភាព និងការបំពេញបន្ថែមរបស់យើង។

ឯកសារបាននិយាយថា ជាផ្នែកមួយនៃកិច្ចព្រមព្រៀង ក្រុមហ៊ុនផលិតយន្តហោះ បានយល់ព្រមចំណាយយ៉ាងហោចណាស់៤៥៥លានដុល្លារអាមេរិកក្នុងរយៈពេល៣ឆ្នាំខាងមុខ ដើម្បីបង្កើនកម្មវិធីសុវត្ថិភាព និងកម្មវិធីបំពេញបន្ថែម។

ឯកសារបាននិយាយថា ក្រុមប្រឹក្សាភិបាលរបស់ក្រុមហ៊ុន Boeing នឹងត្រូវជួបជាមួយសាច់ញាតិរបស់អ្នកដែលបានស្លាប់ក្នុងឧបទ្ទវហេតុធ្លាក់យន្តហោះ MAX ក្នុងរយៈពេល៤ខែ បន្ទាប់ពីការកាត់ទោស។