ចំហេះព្រៃនៅតែបន្តឆាបឆេះពាសពេញភាគខាងលិចសហរដ្ឋអាមេរិក គិតត្រឹមថ្ងៃពុធ (២៤ កក្កដា) ដោយជំរុញឱ្យមនុស្សរាប់ពាន់នាក់ត្រូវជម្លៀសខ្លួន រួមជាមួយនឹងការបិទផ្លូវហាយវេជាច្រើនកន្លែង និងបំផ្លាញផ្ទៃដីរាប់ម៉ឺនហិកតា។

ក្រសួងដឹកជញ្ជូនរបស់រដ្ឋបាននិយាយថា ចំហេះព្រៃដែលគេឱ្យឈ្មោះថា ដឺកឃី (Durkee) ក្នុងរដ្ឋ អហ្គិន (Oregon) បានបិទផ្លូវហាយវេអន្តររដ្ឋលេខ៨៤ (Interstate 84) នៅភាគខាងកើតនៃរដ្ឋក្នុងទិសដៅទាំងពីរកាលពីថ្ងៃអង្គាររវាងទីក្រុង អនថារីអូ (Ontario) និងទីក្រុង បេកឃឺ (Baker City) ដោយព្រមានថា «ភ្លើងកំពុងឆាបឆេះយ៉ាងលឿនឆ្ពោះទៅរកផ្លូវហាយវេនេះក្នុងទីតាំងជាច្រើនទៀត »។

ចំហេះ Durkee ដែលជាចំហេះព្រៃដ៏ធំបំផុតនាពេលបច្ចុប្បន្ននៅក្នុងរដ្ឋ Oregon ត្រូវបានបង្កឡើងដោយរន្ទះ ហើយត្រូវបានគេដឹងនៅព្រឹកថ្ងៃទី១៧ ខែកក្កដា។ វាបានឆេះពាសពេញផ្ទៃដីជាង ៩ម៉ឺនហិចតា ជាមួយមិនទាន់អាចគ្រប់គ្រងបានឡើយគិតត្រឹមថ្ងៃពុធ។ បច្ចុប្បន្នមានចំហេះសកម្មចំនួន ១១៥កន្លែង នៅក្នុងរដ្ឋនេះបើយោងតាមអង្គភាពតាមដានចំហេះព្រៃរបស់រដ្ឋ។

នៅរដ្ឋវ៉ាស៊ីនតោន (Washington) និងកាលីហ្វ័រនីញ៉ា (California) ក៏មើលឃើញចំហេះព្រៃផងដែរ ដែលនាំឱ្យមានការជម្លៀសចេញ និងគំរាមកំហែងដល់រោងចក្រឧស្ម័នធម្មជាតិ។ សេវាព្រៃឈើរបស់សហរដ្ឋអាមេរិក បាននិយាយនៅក្នុងការចេញផ្សាយកាលពីថ្ងៃអង្គារថា ផ្ទៃដីព្រៃឈើជាតិរាប់លានហិចតានៅទូទាំងរដ្ឋ Oregon និង Washington «កំពុងបន្តមើលឃើញលក្ខខណ្ឌព្រៃឈើស្ងួតធ្ងន់ធ្ងរ» គួបផ្សំនឹងព្យុះរន្ទះ ដែលជំរុញឱ្យមាន «កំណើននៃចំហេះព្រៃយ៉ាងឆាប់រហ័ស»៕