មន្ត្រីអាមេរិក កាលពីថ្ងៃពុធ (ទី២៤ ខែកក្កដា) បាននិយាយថា ការចរចាសម្រាប់បទឈប់បាញ់ នៅតំបន់ហ្កាហ្សា និងកិច្ចព្រមព្រៀងដោះលែងចំណាប់ថ្នូរ គឺស្ថិតនៅក្នុង «ដំណាក់ចុងក្រោយ» នៅមុនពេលមានកិច្ចចរចា រវាងប្រធានាធិបតីអាមេរិកលោក Joe Biden និងនាយករដ្ឋមន្ត្រីអ៊ីស្រាអែល លោក Benjamin Netanyahu។

មន្ត្រីរដ្ឋបាលជាន់ខ្ពស់រូបនោះ បានប្រាប់ថា លោក Biden នឹងព្យាយាមបិទបញ្ចប់ «ចន្លោះប្រហោងចុងក្រោយ» មួយចំនួន នៅក្នុងកិច្ចពិភាក្សារបស់លោកជាមួយលោក Netanyahu នៅសេតវិមាន នាថ្ងៃទី២៥ ខែកក្កដា ប៉ុន្តែធាតុសំខាន់ៗ ក្នុងនោះរួមទាំងជោគវាសនារបស់ចំណាប់ថ្នូរផងដែរ នៅតែស្ថិតក្នុងការសម្រេចរបស់ក្រុមហាម៉ាសដដែល។

ដោយនិយាយក្នុងលក្ខខណ្ឌមិនបញ្ចេញឈ្មោះ មន្ត្រីរូបននោះបានប្រាប់ថា៖ «យើងជឿថា វា (កិច្ចព្រមព្រៀង) កំពុងស្ថិតនៅក្នុងដំណាក់ចុងក្រោយ ហើយកិច្ចព្រមព្រៀងមួយ គឺជិតឈានដល់ហើយ»។

លោកបានបន្តថា នឹងមាន «សកម្មភាពជាច្រើននៅក្នុងសប្តាហ៍ខាងមុខនេះ» ដើម្បីឆ្ពោះទៅរកការឈានដល់កិច្ចព្រមព្រៀងដែលស្វែងរកជាយូរមកហើយ ដោយបន្ថែមថា កិច្ចព្រមព្រៀងមួយ គឺ «មិនត្រឹមតែអាចធ្វើទៅបានប៉ុណ្ណោះទេ ប៉ុន្តែវាមានភាពសំខាន់ និងចាំបាច់»។

ជាមួយគ្នានេះ មន្ត្រីដដែលនោះ ក៏បាននិយាយសម្រាលដល់សុន្ទរកថាដ៏ក្ដៅគគុកទៅកាន់សភារបស់លោក Netanyahu កាលពីថ្ងៃទី២៤ ខែកក្កដា ដែលក្នុងសុន្ទរកថានោះ មេដឹកនាំអ៊ីស្រាអែលបានសន្យាថា នឹងមាន «ជោគជ័យទាំងស្រុង» ដោយនិយាយថា កិច្ចពិភាក្សាជាមួយលោក Biden នឹងផ្តោតលើយន្តការនៃកិច្ចព្រមព្រៀង៕