នៅក្នុងសុន្ទរកថាដំបូងរបស់លោក គិតចាប់តាំងពីការដកខ្លួនចេញពីការប្រកួតប្រជែង ប្រធានាធិបតីអាមេរិក លោក Joe Biden បានប្រកាសថា លោកកំពុងបោះបង់ចោលនូវមហិច្ឆតាផ្ទាល់ខ្លួន ដើម្បី «សង្គ្រោះលទ្ធិប្រជាធិបតេយ្យ»។ ការលើកឡើងនេះផ្ទុយគ្នាស្រឡះពីការធ្វើយុទ្ធនាការដ៏ក្តៅគគុក ខណៈដែលពេលនេះ លោក Donald Trump មកពីគណបក្សសាធារណរដ្ឋ បានវាយប្រហារគូប្រជែងខាងគណបក្សប្រជាធិបតេយ្យ លោកស្រី Kamala Harris ដែលជាការប្រឈមគ្នាដំបូង ចាប់តាំងពីលោកស្រី បានជំនួសលោក Biden នៅក្នុងបញ្ជីឈ្មោះជាបេក្ខជនទី១។

លោក Trump បានឲ្យឈ្មោះលោកស្រី Harris ថា ជា «ពួកឆ្វេងនិយមជ្រុល» ខណៈលោកស្រី Harris បានវាយប្រហារលោក Trump ពាក់ព័ន្ធនឹងការកាត់ទោសបទឧក្រិដ្ឋ និងការវិនិច្ឆ័យការក្លែងបន្លំអាជីវកម្ម។ សម្រាប់លោក Biden ដោយលើកឡើងពីក្ដីស្រឡាញ់របស់លោក ចំពោះជាតិ បុរសវ័យ ៨១ឆ្នាំ ដែលជាប្រធានាធិបតីវ័យចាស់បំផុត ក្នុងប្រវត្តិសាស្ត្ររបស់សហរដ្ឋអាមេរិក បានសម្រេចដើរចេញពីឆាកប្រកួតប្រជែងកៅអីសេតវិមាន ដើម្បី «ផ្ដល់តួនាទីនេះដល់មនុស្សជំនាន់ថ្មី»។

លោក Trump បានយល់ថា សុន្ទរកថារបស់លោក Biden ជា «ពាក្យសម្ដីដែលស្ទើរតែមិនអាចយល់បាន» ហើយឥឡូវនេះ រូបលោកត្រូវប្រឈមជាមួយបេក្ខជនវ័យក្មេង គឺលោកស្រី Harris ដែលបានជួបជុំគណបក្សប្រជាធិបតេយ្យយ៉ាងឆាប់រហ័ស និងរៃអង្គាសប្រាក់បានចំនួន ១២៦លានដុល្លារ ចាប់តាំងពីថ្ងៃអាទិត្យ។

លោកស្រី Harris បានសង្កត់ធ្ងន់លើប្រវត្តិសាវតាររបស់រដ្ឋអាជ្ញា ជុំវិញកំណត់ត្រាឧក្រិដ្ឋកម្មរបស់លោក Trump ដោយលើកជាសំណួរថា តើប្រជាជនអាមេរិក ពេញចិត្ត «សេរីភាព ក្តីមេត្តា និងនីតិរដ្ឋ» ជាង «ភាពវឹកវរ ការភ័យខ្លាច និងការស្អប់ខ្ពប់ខ្ពើមដែរ ឬទេ?»។ ការស្ទង់មតិបានបង្ហាញពីការប្រកួតប្រជែងដ៏តឹងតែងមួយ ដោយលោកស្រី Harris នាំមុខលោក Trump ចំនួន ២ភាគរយ នៅក្នុងការស្ទង់មតិរបស់ Reuters/Ipsos ហើយលោក Trump នាំមុខ ៣ភាគរយនៅក្នុងការស្ទង់មតិរបស់ប្រព័ន្ធផ្សព្វផ្សាយ CNN៕