ប្រទេសបង់ក្លាដែសបានបន្ធូរបន្ថយបម្រាមគោចរទូទាំងប្រទេស នៅថ្ងៃព្រហស្បតិ៍ (ទី២៥ ខែកក្កដា) នេះ ខណៈដែលក្រុមនិស្សិតបានថ្លឹងថ្លែងឡើងវិញនូវការតវ៉ារបស់ពួកគេ ប្រឆាំងនឹងច្បាប់ស្តីពីការងាររាជការ ដែលការតវ៉ានោះបាននាំមានភាពចលាចលយ៉ាងខ្លាំងក្លា កាលពីសប្តាហ៍មុន។ អំពើហិង្សានោះបានបណ្ដាលឲ្យមនុស្សយ៉ាងហោចណាស់ ១៩១នាក់ បាត់បង់ជីវិត ក្នុងនោះរួមទាំងមន្រ្តីនគរបាលផងដែរ ហើយបានក្លាយជារូបភាពដ៏អាក្រក់បំផុតមួយ ក្នុងចំណោមស្ថានភាពអាក្រក់បំផុតជាច្រើន អំឡុងពេលកាន់តំណែងរបស់លោកស្រីនាយករដ្ឋមន្ត្រី Sheikh Hasina។

បើទោះបីជាកងទ័ពនៅតែបន្តល្បាត ហើយការផ្ដាច់អ៊ីនធឺណេតទូទាំងប្រទេស នៅតែកើតមានតាមតំបន់ជាច្រើនក៏ដោយ ក៏ការប៉ះទង្គិចគ្នាបានថយចុះ ចាប់តាំងពីមេដឹកនាំបាតុកម្ម បានផ្អាកការតវ៉ាថ្មី។ រដ្ឋាភិបាល បានបន្ធូរបន្ថយបម្រាមគោចរ ដើម្បីអនុញ្ញាតឲ្យមានការធ្វើដំណើរដោយសេរី ចន្លោះពីម៉ោង ១០ព្រឹកដល់ម៉ោង ៥ល្ងាច ម៉ោងក្នុងស្រុក។ វិថីនានា ក្នុងទីក្រុង Dhaka ដែលធ្លាប់តែមានភាពស្ងាត់ជ្រងំ ចាប់ផ្ដើមអ៊ូអរដោយការធ្វើចរាចរណ៍ ហើយធនាគារ ការិយាល័យរដ្ឋាភិបាល និងរោងចក្រកាត់ដេរ បានបើកដំណើរការឡើងវិញ កាលពីថ្ងៃពុធ (ទី២៤ ខែកក្កដា)។

មេដឹកនាំនិស្សិត នឹងសម្រេច នៅថ្ងៃទី២៥ ខែកក្កដានេះថា តើត្រូវពន្យារពេលការតវ៉ារបស់ពួកគេ ដែលផុតកំណត់នៅថ្ងៃទី២៦ ខែកក្កដាដែរ ឬទេ។ លោក Asif Mahmud មកពីក្រុមនិស្សិតប្រឆាំងនឹងការរើសអើងបានទាមទារឲ្យមាន «ការសុំអភ័យទោសពីសំណាក់នាយករដ្ឋមន្រ្តី លោកស្រី Sheikh Hasina ពាក់ព័ន្ធនឹងឃាតកម្មលើនិស្សិត និងឲ្យមានការដកតំណែងរដ្ឋមន្ត្រីក្រសួងមហាផ្ទៃ និងក្រសួងអប់រំ។ ជាមួយគ្នានេះ លោកបានអះអាងថា ចំនួនអ្នកស្លាប់ ត្រូវបានបង្ហាញក្នុងចំនួនតិចតួចជាងការពិត។ នៅក្នុងការតវ៉ា នគរបាលបានចាប់ខ្លួនមនុស្សយ៉ាងហោចណាស់ ២.៥០០នាក់។

គួរបញ្ជាក់ថា ការតវ៉ាបានចាប់ផ្តើមមានឡើងបន្ទាប់ពីគោលនយោបាយខែមិថុនា ដែលបម្រុងទុកការងាររដ្ឋាភិបាលជាងពាក់កណ្តាល សម្រាប់បេក្ខជនមួយចំនួន ដែលធ្វើឲ្យមានវិបត្តិការងារកាន់តែធ្ងន់ធ្ងរ សម្រាប់និស្សិតបញ្ចប់ការសិក្សា។ តុលាការកំពូលបានកាត់បន្ថយ ប៉ុន្តែមិនបានលុបចោលកូតាការងារបម្រុងនោះទេ។ អ្នករិះគន់លើកឡើងថា កូតានេះ ផ្ដល់ផលចំណេញដល់គណបក្ស Awami League របស់លោកស្រី Hasina៕