យន្តហោះទម្លាក់គ្រាប់បែករបស់ប្រទេសរុស្ស៊ី និងចិន នៅថ្ងៃព្រហស្បតិ៍ (ទី២៥ ខែកក្កដា) នេះ បានធ្វើការល្បាតរួមគ្នា នៅចុងភាគខាងកើតរបស់រុស្ស៊ី និងសមុទ្រ Bering ក្បែររដ្ឋ Alaska របស់សហរដ្ឋអាមេរិក។ តែយ៉ាងណាក្ដី ទាំងទីក្រុងម៉ូស្គូ និងក្រុងប៉េកាំង បានសង្កត់ធ្ងន់ថា ការល្បាតនេះមិនមានគោលបំណងកំណត់គោលដៅលើប្រទេសណាមួយឡើយ។

ការល្បាតនេះ មានការចូលរួមពីយន្តហោះទម្លាក់គ្រាប់បែកយុទ្ធសាស្ត្រ Tu-95MS របស់រុស្ស៊ី និង Xian H-6 របស់ចិន។ ការហោះហើរនេះ ត្រូវបានធ្វើឡើង ក្នុងរយៈពេលប៉ុន្មនាថ្ងៃ បន្ទាប់ពីមានរបាយការណ៍ ពាក់ព័ន្ធនឹងការបញ្ជូនយន្តហោះទម្លាក់គ្រាប់បែកយុទ្ធសាស្ត្ររបស់សហរដ្ឋអាមេរិកកៀកនឹងដែនអាកាសរុស្ស៊ី។

នៅមុននេះ ទីបញ្ជាការការពារដែនអាកាសអាមេរិកខាងជើងរួមសហរដ្ឋអាមេរិក-កាណាដា (Norad) បានប្រាប់ថា យន្តហោះចម្បាំងអាមេរិក និងកាណាដា បានស្ទាក់ចាប់យន្តហោះទម្លាក់គ្រាប់បែករបស់រុស្ស៊ី និងចិន ២គ្រឿងដូចគ្នា នៅក្នុងដែនអាកាសអន្តរជាតិក្បែររដ្ឋ Alaska កាលពីថ្ងៃទី២៤ ខែកក្កដា។ ទីបញ្ជាការនេះបានបន្ថែមថា យន្តហោះទម្លាក់គ្រាប់បែកទាំងនោះ «នៅតែស្ថិតក្នុងដែនអាកាសអន្តរជាតិ» ហើយមិនត្រូវបានចាត់ទុកថា ជាការគំរាមកំហែងនោះទេ។

ទីក្រុងមូស្គូបាននិយាយថា ការល្បាតនេះបានប្រកាន់ខ្ជាប់នូវច្បាប់អន្តរជាតិ និងជាផ្នែកនៃផែនការកិច្ចសហប្រតិបត្តិការយោធា សម្រាប់ឆ្នាំ២០២៤ ដោយមិនមែនសំដៅប្រឆាំងនឹងប្រទេសដទៃនោះឡើយ។ ក្រសួងការពារជាតិរបស់ប្រទេសចិន បានបន្ទរបន្ថែមពីករណីនេះ ដោយបញ្ជាក់ថា ការល្បាតមិនមានចេតនាលើភាគីទី៣ ណាមួយឡើយ ហើយមិនពាក់ព័ន្ធនឹងបញ្ហាអន្តរជាតិ ឬតំបន់ នាពេលបច្ចុប្បន្ននោះទេ។

គួរបញ្ជាក់ថា រុស្ស៊ី និងចិន បាន និងកំពុងបង្កើនកិច្ចសហប្រតិបត្តិការខាងយោធា ជាពិសេសចាប់តាំងពីការលុកលុយរបស់រុស្ស៊ីលើអ៊ុយក្រែន៕