ប្រធានាធិបតីអ៊ីស្រាអែល លោក Isaac Herzog នៅថ្ងៃព្រហស្បតិ៍ (ទី២៥ ខែកក្កដា) បានជួបជាមួយមេដឹកនាំរបស់អ៊ីតាលីទាំង ២រូប គឺលោកស្រីនាយករដ្ឋមន្ត្រី Giorgia Meloni និងប្រធានាធិបតី លោក Sergio Mattarella នៅទីក្រុងរ៉ូម។

ការិយាល័យនាយករដ្ឋមន្ត្រីអ៊ីតាលី បានចេញសេចក្ដីប្រកាសពត៌មានស្តីពីកិច្ចប្រជុំនោះ ដែលរៀបរាប់ថា៖ «លោកស្រី Meloni បានរំលឹកឡើងវិញ អំពីភាពជិតស្និទ្ធរបស់រដ្ឋាភិបាលអ៊ីតាលី ជាមួយអ៊ីស្រាអែល និងការថ្កោលទោសយ៉ាងខ្លាំងក្លា ចំពោះអំពើភេរវកម្មរបស់ក្រុមហាម៉ាស»។

សេចក្ដីប្រកាសនោះបានបន្ថែមថា លោកស្រី Meloni ក៏បានបន្តការប្តេជ្ញាចិត្តរបស់អ៊ីតាលី ក្នុងការកាត់បន្ថយភាពតានតឹង ក្នុងកម្រិតតំបន់ ដោយរំលឹកឡើងវិញនូវការដើរតួនាទីរបស់ភាគីអ៊ីតាលី នៅតាមព្រំដែនជាមួយប្រទេសលីបង់ តាមរយៈ UNIFIL (កងកម្លាំងបណ្តោះអាសន្នរបស់អង្គការសហប្រជាជាតិ នៅលីបង់) និងរំលឹកឡើងវិញនូវការព្រួយបារម្ភយ៉ាងខ្លាំងក្លា ចំពោះស្ថានភាពមនុស្សធម៌ នៅតំបន់ហ្កាហ្សាស្ទ្រីប។

បន្ថែមពីលើនោះទៀទ សេចក្តីប្រកាសព័ត៌មាននោះ ក៏បានឲ្យដឹងផងដែរថា លោកស្រី Meloni បានធានាថា ប្រទេសអ៊ីតាលីនឹងបន្តគាំទ្រការសម្របសម្រួលរបស់សហរដ្ឋអាមេរិក និងនាំយកជំនួយផ្ដល់ដល់ប្រជាជនស៊ីវិលប៉ាឡេស្ទីន ក្នុងនោះរួមទាំងតាមរយៈគំនិតផ្តួចផ្តើម «អាហារសម្រាប់តំបន់ហ្កាហ្សា» ផងដែរ៕